Fana: At a Speed of Life!

የብሄራዊ የመረጃና ደህንነት አገልግሎት ዳይሬክተር ጀነራል ኮሚሽነር ደመላሽ ከብሪታኒያ ዓለም አቀፍ የደህንነት አገልግሎት ኃላፊ ጋር ተወያዩ

አዲስ አበባ፣ መስከረም 28፣ 2012 (ኤፍ ቢ ሲ) የብሔራዊ የመረጃና ደህንነት አገልግሎት ዳይሬክተር ጀነራል ኮሚሽነር ደመላሽ ገብረ ሚካኤል ከብሪታኒያ ዓለም አቀፍ የደህንነት አገልግሎት ኃላፊ አሌክስ ያንገር ጋር በኢትዮጵያና በአፍሪካ ቀንድ አካባቢ ባለው ወቅታዊ የፀጥታና የሽብርተኝነት ስጋት ዙሪያ ውይይት አድርገዋል።

ኮሚሽነር ደመላሽ ከሀላፊው ጋር ባደረጉት ውይይት በአፍሪካ ቀንድ የሽብር እንቅስቃሴ እያደረጉ ያሉትን የአልሸባብንና የአይኤስ የሽብር ቡድኖች እንቅስቃሴ ለመግታት ሁለቱ ሀገራት የጀመሩትን የመረጃ ልውውጥ አጠናክረው በመቀጠል በአፍሪካ ቀንድ የሚስተዋለውን የሽብርተኝነት አደጋ ለመከላከል በጋራ እንደሚሰሩ መግባባት ላይ መድረሳቸውን አስታውቀዋል።

ብሔራዊ የመረጃና ደህንነት አገልግሎት በሰው ኃይል፣ በአደረጃጀት፣ በአሰራርና በቴክኖሎጂ ራሱን ለማጠናከር የሚያስችሉ የሪፎርም ስራዎችን እየሰራ መሆኑን የጠቆሙት ኮሚሽነር ደመላሽ፥ ተቋሙ ተልእኮውን በተሻለ መንገድ ለመፈፀም የሚያስቸለውን አመቺ የሆኑ የህግ ማዕቀፍ ማሻሻያዎችን እያደረገ መሆኑን ለኃላፊው አብራርተውላቸዋል።

ከብሪታኒያ ዓለም አቀፍ የደህንነት አገልግሎት በመረጃና ደህንነት ዘርፍ ያለውን የዳበር ልምድ ለኢትዮጵያው አቻ ተቋም ለማካፈል ስምንነት ላይ የተደረሰ መሆኑን በመግለጽ፥ ይህ ሁለቱም በአካባቢው ያለውን የሽብር አደጋና አለመረጋጋት በጋራ ለመከላከል ትልቅ ጠቀሜታ እንዳለው ኮሚሽነር ደመላሽ ገልጸዋል።

የሁለቱ አገራት የመረጃና ደህንነት ተቋማት የቆየ ግንኙነት እንዳላቸው የጠቀሱት ዳይሬክተር ጀነራል ኮሚሽነር ደመላሽ፥ ይህን የቆየ ትብብር ወደ ላቀ ደረጃ ለማሳደግ መግባባት ላይ መደረሱንም ተናግረዋል።

ከብሪታኒያ ዓለም አቀፍ የደህንነት አገልግሎት ኃላፊ አሌክስ ያንገር በበኩላቸው፥ በሁለቱ አገራት የፀጥታና የደህንነት የጋራ ጉዳዮች ዙሪያ እንዲሁም በአፍሪካ ቀንድ የሽብርተኝነት እንቅስቃሴ ዙሪያ ከዳይሬክተር ጀነራሉ ጋር ውይይት መደረጉን ገልፀው በቀጣይ የፀረ-ሽብር እንቅስቃሴን በተመለከተ ስለሚኖራቸው የጋራ ትብብር መግባባት ላይ ተደርሷል ብለዋል፡፡

በተጨማሪም ኃላፊው በቅርቡ ኢትዮጵያ በሽብርተኞች ላይ የወሰደቸውን እርምጃ አድንቀው፥ ብሔራዊ የመረጃና ደህንነት አገልግሎት እያካሄደ ያለው ሪፎርም ትልቅ የለውጥ እርምጃ በመሆኑ በቀጣይ ተቋማቸው ለአገልግሎቱ የአቅም ግንባታና የተሞክሮ ድጋፍ እንደሚያደርግ መግለፃቸውን ነው አገልግሎቱ ለፋና ብሮድካስቲንግ ኮርፖሬት በላከው መግለጫ የጠቆመው።

በውይይቱ መሰረትም የብሪታኒያ ዓለም አቀፍ የደህንነት አገልግሎት /ኤም አይ 6/ በአፍሪካ ቀንድ እያደገ የመጣውን ሽብርተኝነት ከብሄራዊ የመረጃና ደህንነት አገልግሎት ጋር በቅንጅት ለመከላከል ተስማምተዋል፡፡

You might also like
Comments
Loading...