Fana: At a Speed of Life!

የቡና ገለፈትን ወደ ተፈጥሯዊ ማዳበሪያነት የሚቀይር የምርምር ፕሮጀክት ተመረቀ

አዲስ አበባ፣ ጥቅምት 5፣ 2012 (ኤፍ.ቢ.ሲ) የቡና ገለፈትን በስነ ህይወታዊ ዘዴ ወደ ተፈጥሯዊ ማዳበሪያነት የሚቀይረው የምርምር ፕሮጀክት ተጠናቆ ተመረቀ።

በኢትዮጵያ ባዮ ቴክኖሎጂ ኢንስቲቲዩት ድጋፍ በደብረ ብረሃን ዩኒቨርሲቲ የተሰራው ምርምሩ በደቡብ ክልል ሲዳማ ዞን 3 ቀበሌዎች ላይ የተካሄደ ነው።

ምርምሩ የአካባቢው ቡና አምራቾች ለማስወገድ ችግር የሆነባቸውን የቡና ገለፈት በትሎች በማስበላት (በስነህይወታዊ ዘዴ) ወደ ተፈጥሯዊ ማዳበሪያነት መቀየር ያስቻለ ነው።

የቡና ገለፈት ቡና የሚያመርቱ አርሶ አደሮች ለማስወግድ ችግር ሆኖባቸው የቆየ ከመሆኑም ባሻገር መርዛማት ስላለው አካበቢውን ሲበክል የቆየ ነው።

ምርምሩን ያካሄዱት ዶክተር ገዛኸኝ ደግፌ ውሃን በመመረዝ በእንስሳት ላይም ጉዳት ሲያደርስ መቆየቱንና ምርምሩ ይህንን ችግር እንደፈታ ተናግረዋል።

የተፈጥሮ ማዳበሪያውም ለቡና ማዳበሪያነት ጥቅም ላይ ውሎ በአካባቢው አርብቶ አደሮች መወደዱን አብራርተዋል።

የኢትዮጵያ ባዮ ቴክኖሎጂ ኢንስቲቲዩት ዋና ዳይሬክተር ዶክተር ካሳሁን ተስፋየ፥ ኢንስቲቲዩቱ በውጭ የሚከናወኑ 24 ችግር ፈቺ ምርምሮችን እየደገፈ እንደሆነና በቅርቡ ስምንቱ ተመርቀው ወደ ተግበራ እንደሚገቡ ተናግረዋል።

ተቋማቸው ችግር ፈቺ የሆኑ ምርምሮችን መደገፉን እንደሚቀጥልም ማረጋገጣቸውንም የኢኖቬሽን እና ቴክኖሎጂ ሚኒስቴር መሰራ ያመለክታል።

You might also like
Comments
Loading...