Fana: At a Speed of Life!

ውህደቱ ዴሞክራሲን የሚያሳድግ በመሆኑ በፍጥነት ሊተገበር ይገባል – የህዝብ ተወካዮች ምክር ቤት አባላት

አዲስ አበባ ፣ ጥቅምት 12 ፣ 2012 (ኤፍ ቢ ሲ) የኢህአዴግ የውህደት ጉዞ ወቅቱን የጠበቀና ዴሞክራሲን ለማበልጸግ የሚያግዝ በመሆኑ በአጭር ጊዜ ተግባራዊ ሊደረግ እንደሚገባ የህዝብ ተወካዮች ምክር ቤት አባላት ተናገሩ።

ከፋና ብሮድካስቲንግ ኮርፖሬት ጋር ቆይታ ያደረጉት የምክር ቤቱ አባላት የውህደት እሳቤው ምንም አይነት የአላማ ልዩነት የሌለበት በመሆኑ የሀሳብ ልዩነቱን በውይይት በመፍታት ውህደቱን ከግብ ማድረስ ይገባል ብለዋል።

ረዘም ያሉ አመታትን ያስቆጠረው የኢህአዴግ የውህደት ሀሳብ አሁን ላይ ጥናቱ ተጠናቆ ውይይት እየተደረገበት ይገኛል።

እሳቤው ደግሞ አንድ የፖለቲካና የኢኮኖሚ ተጠቃሚ ማህበረሰብን በመፍጠር 30 አመታት ያስቆጠረውን ግንባሩን ጨምሮ ሀገርና ህዝብን መጥቀም ነው ተብሏል።

የህዝብ ተወካዮች ምክር ቤትና የኢህአዴግ አባላቱ የውህደት እሳቤው ምንም አይነት የአላማ ልዩነት የሌለበት በመሆኑ የሀሳብ ልዩነቱን በውይይት በመፍታት ውህደቱን ከግብ ማድረስ ይገባል ብለዋል።

ውህድ ፓርቲውን ለመመስረት በሚደረገው ጥረት የሚታዩ አንዳንድ የሃሳብ ልዩነቶችም መብትን መሰረት ባደረገ መልኩ የተንጸባረቁ በመሆኑ በውይይት መፈታት የሚችል መሆኑንም ገልጸዋል።

ይሁን እንጅ የልዩነት ሀሳቡ የቀረበበት መንገድ ከስነ ምግባር ውጭ መሆኑንም አባላቱ ጠቅሰዋል።

በተጨማሪም ውህደቱን ከአሃዳዊና ፌደራሊዝምን ከማፍረስ ጋር ማገናኘት ከጥቅመኝነት ተነስቶ የቀረበ እንጅ የውህደቱን ጽንሰ ሀሳብ የሚገልጽ አይደለምም ነው ያሉት።

ይልቁንም የኢህአዴግ የውህደት ጉዞ ከግብ ከደረሰ ፌደራሊዝምን በትክክል ተግባራዊ ለማድረግ የሚያስችል መሆኑንም የምክር ቤት አባላቱ አንስተዋል።

ጠቅላይ ሚኒስትር ዶክተር አብይም ሀገር ከኢህአዴግ በላይ መሆኑን ሁሉም ሊረዳ እንደሚገባ ማስገንዘባቸው ይታወሳል።

አሁን ወደ መጨረሻው ምዕራፍ የሚገኘው የኢህአዴግ የውህደት እንቅስቃሴ ወይይቱ ተጠናቆ በቅርቡ ይፋ እንደሚደረግ ይጠበቃል።

 

 

በሃይለኢየሱስ ስዩም

You might also like
Comments
Loading...