Fana: At a Speed of Life!

ከ2012 መግቢያ አንሰቶ የተከናወኑ ህዝባዊና ሃይማኖታዊ በዓላት በሰላማዊ ሁኔታ ተከብረዋል- የፌዴራል ፖሊስ

አዲስ አበባ፣ መስከረም 27፣ 2012 (ኤፍ.ቢ.ሲ) ከ2012 ዓ.ም መግቢያ አንሰቶ የተከናወኑ ህዝባዊና ሃይማኖታዊ በዓላት ያለምንም የጸጥታ ችግር በሰላም መጠናቀቃቸውን የፌደራል ፖሊስ ኮሚሽን ገለጸ።
የፌዴራል ፖሊስ ኮሚሽን እስካሁን የተከበሩ ህዝባዊና ሃይማኖታዊ በዓላትን አስመልክቶ ለመገናኛ ብዙሃን መግለጫ ሰጥቷል።
 
በፌዴራል ፖሊስ ኮሚሽን የወንጀል መከላከል ዘርፍ ሃላፊ ምክትል ኮሚሽነር ጀነራል መላኩ ፈንታ በመግለጫቸው፥ የአዲስ ዓመት ዋዜማን ጨምሮ የመስቀል ደመራ በአል እና እሬቻ ያለምንም የጸጥታ ችግር በሰላም መጠናቀቃቸውን አስታውቀዋል።
 
ህዝባዊና ሃይማኖታዊ በዓላት በሰላማዊ ሁኔታ እንዲጠናቀቁም ህዝቡ ከፖሊስ ጋር ተባብሮ መስራቱን ነው ምክትል ኮሚሽነር ጀነራል መላኩ ፈንታ ያስታወቁት።
 
ምክትል ኮሚሽነሩ አክለውም፥ ህዝቡ በተለይ ደግሞ ወጣቱ ህዝባዊና ሃይማኖታዊ በዓላቱ ሰላማዊ ሆነው እንዲጠናቀቁ ከፖሊስ ጋር ተባብሮ ለሰራው ስራ አመስግነዋል።
 
ከዚህ በተጨማሪ በተለይ በእሬቻ እና የደመራ በዓል ምክንያት ለነበረው የመንገድ መዘጋጋት የአዲስ አበባ ህዝብ ላሳየው ትእግስት እና ትብብር ምስጋናቸውን አቅርበዋል።
 
ህዝቡ በቀጣይም በመሰል ሀገራዊ፣ ባህላዊና ሃይማኖታዊ በአላት ላይ ይህን አጠናክሮ እንዲቀጥልም ምክትል ኮሚሽነር መላኩ ፈንታ ጥሪ አቅርበዋል።
 
ምክትል ኮሚሽነሩ የፌደራል፣ የአዲስ አበባ እና የኦሮምያ ፖሊስ በመናበብ እና በመተባበር ላደረጉት አስተዋጽኦም አመስግነዋል።
 
በትእግስት አብርሃም
You might also like
Comments
Loading...