Fana: At a Speed of Life!

ከወጪ ንግድ የሚገኘውን ገቢ ለማሳደግ የሚያስችል መመሪያ እየተዘጋጀ ነው

አዲስ አበባ፣መስከረም 27፣2012 (ኤፍ ቢ ሲ) የወጪ ንግድን በአግባቡ በመምራት ከጊዜ ወደ ጊዜ እያሽቆለቆለ የመጣውን የወጪ ንግድ ገቢ ለማሻሻል የሚያስችል መመሪያ እየተዘጋጀ መሆኑን የንግድና ኢንዱስትሪ ሚኒስቴር አስታወቀ፡፡

መመሪያው ግብይታቸው በኢትዮጵያ ምርት ገበያ በኩል የሚፈጸም የወጪ ምርቶችን በሚልኩ ነጋዴዎች ላይ ተግባራዊ የሚደረግ መሆኑ ተገልጿል፡፡

መንግስት የሚከተለውን የወጪ ንግድ መር ስትራቴጂ ተግባራዊ ለማድረግ ብዙ ጥረቶች ቢደረጉም የተቀመጠውን ግብ ማሳካት አለመቻሉን ሚኒስቴሩ አስታውቋል።

የወጪ ንግድ ኮንትራትን በውሉ መሰረት አለመፈጸም፣ ከአለም ገበያ ዋጋ በላይ መግዛትና ከገዙበት ዋጋ በታች መሸጥ፣ ኮንትሮባንድ፣ የምርት ጥራትና አቅርቦት ውስንነት በዘርፉ የተቀመጡ ግቦች አለመሳካት ምክንያት መሆናቸው ተገልጿል።

መመሪያው በተለይም የወጪ ንግድ ውል ምዝገባ በአግባቡ ባለመፈጸሙ የወጪ ንግዱ እየተዛባ በመሆኑ የንግዱ ተዋናዮችና መንግስት ተወያይተው ባስቀመጡት መፍትሄ መነሻነት የተዘጋጀ መሆኑ ተመላክቷል፡፡

መመሪያው ተጠናቆ ወደ ተግባር ሲገባ የወጪ ንግድ ውል ምዝገባና ቅንጅታዊ የአስተዳደር ስራ በመስራት በውድድር ላይ የተመሰረተ፣ ፍትሐዊ የወጪ ንግድ አሰራር በዘላቂነት በመገንባት የውጪ ምንዛሪ ግኝት ከፍ እንዲል ያስችላል ተብሏል፡፡

በተጨማሪም በውላቸው መሰረት የማይፈጽሙ ላኪዎች ላይ አስተዳደራዊና ህጋዊ እርምጃዎችን በመውሰድ የሀገሪቱን የውል አተገባበር መልካም ገጽታ ለመገንባትና በውጪ ገበያ ላይ የምናቀርባቸውን ምርቶች በመጠንም ሆነ በአይነት ለማሳደግ ያግዛል።

ይህ መመሪያም በ2012 የምርት ዘመን በሚገኙ የወጪ ንግድ ምርቶች ተግባራዊ መሆን የሚጀምር መሆኑ ከንግድና ኢንዱስትሪ ሚኒስቴር ያገኘነው መረጃ ያመላክታል።

ሚኒስቴር መስሪያ ቤቱ በወጪ ንግድ ስራ ላይ ከተሰማሩ ላኪዎች ጋር በመመሪያው ረቂቅ ዙሪያ ውይይት ማድረጉ ታውቋል።

 

You might also like
Comments
Loading...