Fana: At a Speed of Life!

ከኦጋዴን እስከ ጅቡቲ የድፍድፍ ነዳጅ ማስተላለፊያ መስመር ግንባታን በዚህ ዓመት ለማስጀመር ድርድር እየተካሄደ ነው

አዲስ አበባ፣ ጥቅምት 13፣ 2012 (ኤፍ.ቢ.ሲ) የድፍድፍ ነዳጅ ማስተላለፊያ መስመር ግንባታም ከኦጋዴን እስከ ጅቡቲ ድረስ በዚህ አመት ለማስጀመር ድርድር እየተካሄደ መሆኑን የማእድንና ነዳጅ ሚኒስቴር አስታወቀ።

ሚኒስትር ዴኤታ ዶክተር ኳንግ ቱትላን ለፋና ብሮድካስቲንግ ኮርፖሬት እንደተናገሩት፥ ስለነዳጅ ማስተላለፊያ መስመር ዝርጋታ ከጅቡቱ ጋር ያለው የስምምነት ፊርማ በሚኒስትሮች ምክር ቤት ለመፅደቅ እየተጠባበቀ ነው።

ስምምነቶች ሲጠናቀቁም የማስተላለፊያ መስመር ግንባታ እንደሚጀመርም አስታውቀዋል።

ሚንስትር ደኤታው እንደሚሉት፥ ከኩባንያዎች ጋር ያለውን ድርድር በፍጥነት በመጨረስ ከኦጋዴን እስከ ጅቡቲ ኢላላ ድረስ ያለውን 760 ኪሎ ሜትር ቱቦ ዝርጋታ በያዘነው ዓመት ይጀመራል።

ስራው ቱቦን ከመዘርጋት ባሻገር ጅቡቲ ወደብ የተፈጥሮ ጋዝ ማቀነባበያ መገንባትንም የካተተ መሆኑንም ተናግረዋል።

ሚኒስቴሩ ከአንድ አመት በፊት በኦጋዴን የተጀመረው ድፍድፍ ነዳጅ በሙከራ ደረጃ የማውጣት ሂደት ጥሩ ውጤቶች እየታዩበት እንደሆነም ነው ያስታወቀው።

በብዙ የኢትዮጵያ አካባቢዎች የተፈጥሮ ጋዝና ነዳጅ እንዳለ ቢታመነም የምስራቅ ኢትዮጵያው ግን በቂ ማስረጃ የተገኘበት ስለመሆኑ ጠቅላይ ሚኒስትር ዶክተር ዓብይ በ2010 ሰኔ ወር ይፋ አድርገው እንደበረ ይታወሳል።

የቻይናው ፖሊ ሲ ጂ ኤል ኩባንያ በምስራቅ ኢትዮጵያ ሶማሌ ክልል ያደረገው የዓመታት የተፈጥሮ ጋዝ ፍለጋ ውጤት አስገኝቶ በሙከራ ምርት ደረጃ በቀን 450 በርሚል ድፍድፍ ነዳጅ ይወጣል መባሉም አይዘነጋም።

ኦጋዴን ላይ የተጀመረው የሙከራ ምርት መቀጠሉን፤ በአሁኑ ወቅት ጥሩ ውጤት እየታየበት መሆኑንም የማእድንና ነዳጅ ሚኒስቴር አስታውቋል።

ሚኒስትር ዴኤታው እንደተናገሩት፥ እስካሁን 3 ሺህ 900 በርሜል ድፍድፍ ነዳጅ ወጥቶ ለሽያጭ ቀርቧል።
1 ሺህ በርሜል ድፍድፍ ነዳጅ ደግሞ ተከማችቷል ብለዋል ሚኒስትር ደኤታው።

በሀገራችን ነዳጅን በማፈላለግ ስራ የተሰማሩ ኩባንያዎች ፍንጭ በመስራት ላይ የሚገኙ ሲሆን፥ ባለፉት ዓመታት ወሎ ለገይዳ የተባለ ቦታ የነዳጅ ቅሪት ታይቶ ይህን ሲያፈላልግ የነበረው ኩባንያ የገንዘብ እጥረት ገጥሞት ማቋረጡትን ዶክትር ኳንግ ነግረውናል።

ይህንን ለማስቀጠል ከሌላ ኩባንያ ጋር ድርድር ተጀምሯል ያሉት ሚኒስትር ደኤታው፥ አርባ ምንጭ አካባቢም ተመሳሳይ ስራ እንደሚኖር አስታውቀዋል።

በአላዛር ታደለ

You might also like
Comments
Loading...