Fana: At a Speed of Life!

ኢትዮጵያ ከዓለም አቀፍ ትብብር ገምጋሚ ቡድን ክትትል ሂደት መውጣቷ ተገለፀ

አዲስ አበባ፣ ጥቅምት11፣ 2012 (ኤፍ ቢ ሲ) ኢትዮጵያ በወንጀል ድርጊት የተገኘ ገንዘብ ወይም ንብረት ህጋዊ አስመስሎ የማቅረብ ወንጀልን የመከላከልና የመቆጣጠር ስርዓቷን በከፍተኛ ደረጃ ማሻሻሉ ተገለጸ።

የሰላም ሚኒስትር ወይዘሮ ሙፈሪያት ካሚል ባዛሬው ዕለት ጉዳዩን አስመልክተው በዛሬው ዕለት ጋዜጣዊ መግለጫ ሰጥተዋል።

ሚኒስትሯ በመግለጫቸው ኢትዮጵያ በወንጀል ድርጊት የተገኘ ገንዘብ ወይም ንብረት ህጋዊ አስመስሎ ማቅረብ እንዲሁም ሽብርተኝነትንና የጅምላ ጨራሽ መሳሪያዎች ብዜትን በገንዘብ የመርዳት ወንጀሎችን የመከላከልና የመቆጣጠር ስርዓቷን በከፍተኛ ደረጃ ያሻሻለች መሆኗን ዓለም አቀፍ ገምጋሚ የሆነው የፋይናንስ ግብረ ሃይል (FATF) መወሰኑን አስታውቀዋል።

የፋይናንስ ድርጊት ግብረ ሃይል የተባለ ዓለም አቀፍ ገምጋሚ ቡድን በወንጀል ድርጊት የተገኘ ገንዘብ ወይም ንብረት ህጋዊ አስመስሎ ማቅረብ እና ሽብርተኝነትን በገንዘብ መደገፍ ወንጀሎችን መከላከልና መቆጣጠር አስመልክቶ 40 ምክረ ሃሳቦችን አውጥቶ የሀገራትን ሁኔታ በየጊዜው የሚገመግም ነው።

ሚኒስትሯ ኢትዮጵያ ቡድኑ ካስቀመጣቸው 40 ምክረ ሀሳቦች አንፃር ጉልህ ክፍተት እንዳለባት በመገምገሙ ስሟ በፋይናንስ ድርጊት ግብረ ሃይል ድረ- ገፅ ሰፍሮ መቆየቱን አስታውሰዋል።

ይህም ዓለም አቀፍ ኢንቨስተሮች ወደ ሀገሪቱ እንዳይገቡ፣ ወደ ውጭ የሚላኩ የሀገሪቱን ምርቶች በጥርጣሬ ማየትና ደፍሮ አለመግዛት እናበ ባንኮች ከሌሎች ሀገራ ጋር የነበራቸው ግንኙነት ደካማ አድርጎት መቆየቱንና ባላሃብቶ ለሚያስገቧቸውና ለሚሉካቸው ዕቃዎች ተግዳሮት የነበረ መሆኑን ነው የገለጹት።

ይሁን እንጂ ካለፈው ጥቅምት 07 ቀን 2012 ዓ.ም ጀምሮ ዓለም አቀፍ ገምጋሚ የሆነው የፋይናንስ ግብረ ሃይል የሀገሪቱን ሁኔታ በመገምገም ከዓለም አቀፍ ትብብር ገምጋሚ ቡድን (ICRG) ክትትል ሂደት እንድትወጣ መወሰኑን ተናግረዋል።

ይህም የኢትዮጵያን ገፅታ በመገንባት ዓለም አቀፍ ኢንቨስተሮች ወደ ሀገራችን ያለጥርጣሬ እንዲገቡ፣ የአውሮፓ ሀገራት በኢትዮጵያ ላይ ያላቸውን ቁጥጥርና ክትትል እንዲያላሉ እና ባንኮች ከድንበር ተሻጋሪ ባንኮች ጋር ያላቸው ግንኙነት ከፍ እንዲል የሚያስችል መሆኑን አንስተዋል።

እንዲሁም በሀገሪቱ ውስጥ የሚገኙ ባለሃብቶች በየትኛውም የዓለማችን ክፍል ያለጥርጣሬ እንዲታዩና መሰል ጥቅሞች ይዞ እንዲመጣ እንደሚያደርግ ነው ወይዘሮ ሙፈሪያት የገለጹት።

መሰል ችግሮች ዳግም እንዳይከሰቱም በሀገር አቀፍ ደረጃ የተለያዩ የፋይናንስ ተቋማትን ያካተተ ብሄራዊ የክትትል ቡድን በማቋቋም በቅንጅት እየተሰራ መሆኑን ጠቁመዋል።

በዚህ መሰረትም የሀገርን ገጽታ መገንባት፣ አለም አቀፍ ኩባንያዎችን መጋበዝ እና የገቢ እና ወጪ ንግዱን በመደበኛ የፋይናንስ ቁጥጥር ስርዓት እንዲሆን የማድረግ ስራ በቀጣይ የሚሰሩ ተግባራት መሆናቸውን አመላክተዋል።

በቆንጂት ዘውዴ

You might also like
Comments
Loading...