Fana: At a Speed of Life!

ኢትዮጵያ በደቡብ ሱዳን ለሚመሰረተው ጥምር ጦር ስልጠና የሚውል የቁሳቁስ ድጋፍ አደረገች

አዲስ አበባ፣ ጥቅምት 4፣ 2012 (ኤፍ.ቢ.ሲ) ኢትዮጵያ በደቡብ ሱዳን ለሚመሰረተው የአንድ ጥምር ጦር ስልጠና አገልግሎት የሚውል የቁሳቁስ ድጋፍ አደረገች።

በደቡብ ሱዳን የሰላም ስምምነት መሰረት ከአንድ ወር በኋላ በሚመሰረተው የሽግግር መንግስት ከመንግስትና ከሁሉም የስምምነቱ ፈራሚ ታጣቂ ቡድኖች የተውጣጣ የአንድ ጦር ኃይል ምስረታ ሠራዊቱ በየማሰልጠኛ ጣቢያው በመግባት ለስልጠና ዝግጁ ሆኗል።

ሀገሪቱ ካለባት ኢኮኖሚያዊ ችግር የተነሳ የዓለም አቀፉ ማህበረሰብ ድጋፍ እንዲያደርግላት ባቀረበችው ጥያቄ መሠረት የኢትዮጵያ መንግስትም ለጦሩ ስልጠና የሚውል የቁሳቁስ ድጋፍ ማድረጉን የውጭ ጉዳይ ሚኒስቴር ቃል አቀባይ ጽህፈት ቤት አስታውቋል።

በዚህ መሠረት የስልጠና ቱታዎች፣ ድንኳኖች፣ ስሊፒንግ ባግ፣ የነፍስ ወከፍ ወታደራዊ የጀርባ ቦርሳዎች ስጦታ የቀረበ ሲሆን፥ የመጀመሪያው ዙር ድጋፍ በኢትዮጵያ አየር ኃይል ወታደራዊ የጭነት አውሮፕላን ዛሬ ጠዋት ጁባ ገብቷል።

የቁሳቁስ ድጋፉ በአጠቃላይ የ13 ሺህ ቱታዎች፣ 2 ሺህ 800 ቦርሳዎች፣ 2 ሺህ ስሊፒንግ ባግ፣ እና 100 ድንኳኖች እንዲሁም አንሶላና የወታደር ጫማ የሚያጠቃልል ሲሆን፥ ሁሉም በዚህ ሳምንት ውስጥ ተጓጉዞ ይጠናቀቃል ተብሎ ይጠበቃል ተብሏል።

በመጀመሪያው ዙር በረራ የቀረበውን ድጋፍ ርክክብ በተደረገበት ወቅት የደቡብ ሱዳንን ስምምነት አተገባበር የሚከታተለው የብሔራዊ ቅድመ ሽግግር ኮሚቴ ምክትል ሰብሳቢ የሆኑት ገብርኤል ቻንሰን ቻንግ ደቡብ ሱዳን ተግባራዊ እያደረገችው ላለው የሰላም ስምምነት የኢትዮጵያ ሚና ከፍተኛ መሆኑን ገልፀዋል።

ለጋራ መከላከያ ሠራዊቱ ስልጠና እንዲውል ለተደረገው ድጋፍ ምስጋናቸውን አቅርበዋል፡፡

ቻንሰን አያይዘውም “የሰላም ስምምነቱን ተግባራዊ ለማድረግ ወሳኝ ምእራፍ ላይ ባለንበት ጊዜ ላይ የተገኘ ድጋፍ በመሆኑ በትክክለኛ ጊዜ የቀረበ ነው” ያሉ ሲሆን፣ ይህን ድጋፍ ውጤታማ በሆነ መልኩ ለታለመለት ዓላማ እንዲውል የሚደረግ መሆኑን አረጋግጠዋል፡፡

በደቡብ ሱዳን የኢፌዲሪ አምባሳደር አቶ ተፈሪ ታደሰ በበኩላቸው፥ ኢትዮጵያ በኢጋድ ሊቀመንበርነቷ ለደቡብ ሱዳን ሰላም ስምምነት የተጫወተችውን ከፍተኛ ሚና በመግለጽ፣ አሁንም በተገባው ቃል መሠረት ይህ ለወታደራዊ ስልጠና የሚያገለግሉ ቁሳቁስ ድጋፍ መደረጉና ይህም ኢትዮጵያ ለሰላም ስምምነቱ ያላትን ቁርጠኝነት የሚያሳይ መሆኑን ገልጸዋል።

ኢትዮጵያ ወንድም ለሆነው የደቡብ ሱዳን ህዝብ ሰላምና ብልጽግና ሁሌም የምትችለውን ድጋፍ የምታደርግ መሆኗንም ጨምረው ገልጸዋል።

You might also like
Comments
Loading...