Fana: At a Speed of Life!

አቶ ገዱ ከደቡብ ሱዳን ጥምር ክትትል እና ግምገማ ኮሚሽን አባላት ጋር ተወያዩ

አዲስ አባበ፣ ጥቅምት 4፣ 2012 (ኤፍ ቢ ሲ) የኢፌዴሪ የውጭ ጉዳይ ሚኒስትር አቶ ገዱ አንዳርጋቸው ከደቡብ ሱዳን ጥምር የክትትል እና ግምገማ ኮሚሽን አባላት ጋር በዛሬው ዕለት ተወያይተዋል።

በውይይታቸውም በአሁኑ ወቅት በደቡብ ሱዳን ተፋላሚ ወገኖች መካከል ሰላም ለማስፈን እየተሰራ ያለው ስራ እጅግ ወሳኝ ምዕራፍ ላይ የሚገኝ መሆኑን አቶ ገዱ አንስተዋል።

ስምምነቱ እንዲሳካ ከመቼውም ጊዜ በላይ ጥረት ማድረግ ያስፈልጋል ያሉት ሚኒስትሩ፥ ባለድርሻ አካላት እና የስምምነቱ ፈራሚዎች ቁርጠኝነታቸውን በተግባር በማሳየት በሀገሪቱ ዘላቂ ሰላም ለማስፈን መንቀሳቀስ እንዳለባቸው አስገንዝበዋል።

የኮሚሽን ተጠባባቂ ሰብሳቢ አምባሳደር አውጎስቲን ጆሮጌ እና ልኡካቸው የደቡብ ሱዳን ተፋላሚ ወገኖች በደቡብ ሱዳን ዘላቂ ሰላም ለማስፈን ባለፈው ዓመት መስከረም ወር አዲስ አበባ ላይ በደረሱት ስምምነት መሰረት የተከናወኑ እና ቀሪ ስራዎችን በተመለከተ ገለጻ አድርገዋል።

የኮሚሽኑ አባላት የደቡብ ሱዳን ጥምር መንግስት ምስረታ በተደረሰው ስምምነት መሰረት የተቀመጠው የጊዜ ሰሌዳ የፊታችን ህዳር ወር የመጀመሪያው ሳምንት ከመጠናቀቁ በፊት መከናወን ባለባቸው ጉዳዮች ዙሪያም ያላቸውን ሃሳብ አቅርበዋል።

አባላቱ በተለይም በደቡብ ሱዳን ጥምር የፀጥታ ሃይል ለመመስረት፣ በሀገሪቱ የሚመሰረቱ ክልሎችን ብዛት መወሰን እና በክልሎች መካከል ያለውን ድንበር በመወሰን ላይ ያጋጠሙ ተግዳሮቶችን በተመለከተ ሰፊ ገለጻ አድርገዋል።

የኢጋድ አባል ሀገራትና ሌሎች ባለድርሻ አካላት በደቡብ ሱዳን ዘላቂ ሰላም እንዲሰፍን እስከዛሬ ያደረጉትን ድጋፍ በተሻለ አጠናክረው እንዲቀጥሉም ጥሪ አቅረበዋል።

የውጭ ጉዳይ ሚኒስትር አቶ ገዱም በቡድኑ አባላት ስለተደረገላቸው ገለጻ ምስጋና ማቅረባቸውን ከውጭ ጉዳይ ሚኒስቴር ያገኘነው መረጃ ያመላክታል።

በተጨማሪም በእስካሁኑ ሂደት በደቡብ ሱዳን የስምምነቱ ፈራሚዎች መካከል የተደረሰው ስምምነት በተቀመጠው የጊዜ ሰሌዳ መሰረት ተግባራዊ እንዲደረግ የቡድኑ አባላት ያከናወኑትን ስራ አድንቀዋል።

You might also like
Comments
Loading...