Fana: At a Speed of Life!

ኖኪያ የ4G እና 5G የቴሌ ኮሙዩኒኬሽን አገልግሎት በኢትዮጵያ ሊዘረጋ ነው

አዲስ አበባ፣ ጥቅምት 5፣ 2012 (ኤፍ.ቢ.ሲ) ኖኪያ የ4G እና 5G የቴሌ ኮሙዩኒኬሽን አገልግሎት በኢትዮጵያ ለመዘርጋት መዘጋጀቱን ገለፀ።

ኩባንያው ከአዲስ አበባ ሳይንስና ቴክኖሎጂ ዩኒቨርሲቲ እና ከአዲስ አበባ ኢንፎርሜሽን ቴክኖሎጂ ኢኒስቲትዩት ጋር የዲጂታል ክህሎትንና የፈጠራ አቅምን ማጎልበት ዙሪያ በጋራ ለመስራት የሚያስችለውን ስምምነት ተፈራርሟል።

ፊርማውን የአዲስ አበባ ሳይንስ እና ቴክኖሎጂ ዩኒቨርሲቲ ፕሬዚዳንት ዶክተር ደረጀ እንግዳ እና የአዲስ አበባ ኢንፎርሜሽን ቴክኖሎጂ ኢኒስቲትዩትን በመወከል ዶክተር ኢንጂነር ኢሳያስ ገብረዮሀንሰ እንዲሁም በመካከለኛው ምስራቅና ምዕራብ አፍሪካ የኖኪያ ተጠሪ ዳንኤል ጃገር ፈርመውታል።

ስምምነቱ ኩባንያው ለሁለቱ ዩኒቨርሲቲዎች በኢንፎርሜሽን ቴክኖሎጂ መስክ አለም የደረሰበትን አሰራር እና የቴክኖሎጂ ገበያውን ፍላጎት መሰረት ያደረገ ዘመናዊ የትምህርት እና ስልጠና ፕሮግራሞችንና የልምድ ልውውጦችን ማዘጋጀትን እንደሚያካትት የኢኖቬሽንና ቴክኖሎጂ ሚኒስቴር አስታውቋል።

የኢኖቬሽን እና ቴክኖሎጂ ሚኒስትር ዶክተር ኢንጂነር ጌታሁን መኩሪያ፥ የአለም ሃብት በስፋት በኢኖቬሽንና ቴክኖሎጂ ዘርፍ አየመነጨ ስለሚገኝ ተወዳዳሪ ሆኖ ለመገኘት የሰለጠነ የሰው ሃይል ከማፍራት ጀምሮ በዘርፋ የስራ እድል ለመፍጠር ኢትዮጵያ በርካታ ተግባራትን በማከናወን ላይ መሆኗን አብራርተዋል።

በስነ ስርዓቱ ላይ የተገኙት የፊንላንድ ልማት ትብብር እና የውጭ ንግድ ሚኒስትር ቫሊ ስኪናር፥ የፊንላንድ ባለሃብቶች በኢትዮጵያ የተፈጠሩትን አዳዲስ እድሎች በመጠቀም በተለያ ዩ ዘርፎች እንዲሰማሩ ይሰራል ብለዋል።

ኖኪያ በአውሮፓውያኑ በ1865 በፊንላንዷ ሄልንሲኪ ከተማ የተመሰረተ የቴክኖሎጂ ተቋም ሲሆን፥ በ2018 የተቋሙ መረጃ መሰረት 6 ነጥብ 1 ቢሊየን በላይ ተገልጋዮች፣ 22 ነጥብ 56 ቢሊየን ዶላር ገቢ እና ከ103 ሺህ በላይ ሰራተኞች ያሉት ተቋም ነው።

You might also like
Comments
Loading...