Fana: At a Speed of Life!

ትናንት ምሽት በአክቲቪስት ጃዋር መሃመድ ላይ የተፈጸመው ተግባር ተቀባይነት የሌለውና ስህተት ነው – አቶ ሽመልስ

አዲስ አበባ ፣ ጥቅምት 12 ፣ 2012 (ኤፍ ቢ ሲ) ትናንት ምሽት የአክቲቪስት ጃዋር መሃመድ ጠባቂዎችን ለማንሳት የተፈጸመው ተግባር በማንኛውም መመዘኛ ተቀባይነት የሌለውና ስህተት መሆኑን የኦሮሚያ ክልል ምክትል ርዕሰ መስተዳድር አቶ ሽመልስ አብዲሳ ተናገሩ።

አቶ ሽመልስ ዛሬ በሰጡት መግለጫ ድርጊቱ በመንግስት የማይታወቅ ከመሆኑ ባሻገር በዚህ ጉዳይ የተሳተፉ አካላት ላይ ማጣራት ተደርጎ እርምጃ እንደሚወሰድና ለህብረተሰቡም ይፋ እንደሚሆን ተናግረዋል።

ጃዋር ጥበቃ ሲደረግለት የነበረው በመንግስት ታምኖበትና በምክንያት መሆኑን ጠቅሰው፥ አሁንም በነበረው መሰረት እንደሚቀጥልና የተቀየረ ውሳኔ እንደሌለም ገልጸዋል።

ይህን ተከትሎ በተለያዩ ከተሞች በተደረገው ሰልፍ ህብረተሰቡ ትክክለኛ ስሜትና ጥያቄውን አቅርቧል ያሉት አቶ ሽመልስ፥ አንዳንድ ልዩ ተልዕኮ ያላቸው አካላት ግን ተቀላቅለው በንብረት ላይ ውድመትና ዘረፋ ለመፈጸም ተንቀሳቅሰዋልም ነው ያሉት።

እነዚህ ኃይሎች ጉዳዩ የሃይማኖትና የብሔር መልክ እንዲይዝ መንቀሳቀሳቸውንም አንስተዋል።

የሃገር ሽማግሌዎች ወጣቱና በአጠቃላይ ነዋሪው ይህን በማረጋጋትና የፀረ ህዝብ ተልዕኮዎች ግባቸውን እንዳይመቱ ላደረጉት ጥረትም ምስጋና አቅርበዋል።

የኦሮሞ ህዝብ ለድል የበቃውና ፈተናዎችን ያለፈው በአንድነትና በትብብር በጋራ በመቆሙ መሆኑን ጠቅሰው፥ ዛሬም ይህን ትልቅ ሃብቱን እንዲንከባከብና ተግባር ላይ እንዲያውልም ጠይቀዋል።

የተፈጠረው ስህተት እንዳይደገም እንደሚሰራና አክቲቪስት ጃዋር በመልካም ሁኔታ ላይ እንደሚገኝም አውስተዋል።

ህዝቡም ተረጋግቶ ሰላሙን እንዲያስከብርም ጥሪያቸውን አቅርበው፥ ለተጎዱ ወገኖችም የተሰማቸውን ሃዘን ገልጸዋል።

በተያያዘ የኦሮሚያ ፖሊስ ኮሚሽን ኮሚሽነር ጄነራል ከፍያለው ተፈራ፥ የኦሮሚያ ፖሊስ ለክልሉ ወሳኝ ለሆኑ ሰዎች ጥበቃ ለማድረግ እና ክልሉን ለማረጋጋት እንደሚሰራ አስታውቀዋል።

በትናንትናው እለት የተፈጠረው ችግር አንዱ አንዱን ባለመረዳቱ በመረጃ ክፍተት የመጣ ነው፤ በዚህ መሃል ግን ችግሩን ሌላ አላማ ለመዋል ያሰበ አካል እንዳለም ኮሚሽነሩ ገልፀዋል።

ኦሮሚያ ፖሊስ የህዝብ ጋሻ ነው ያሉት ኮሚሽነሩ፥ ህዝቡ አሁን በሀገሪቱ ካለው ላውጥ ተጠቃሚ አንዲሆን አስፈላጊውን መሰዋዕትነት ለመክፈል ዝግጁ መሆኑንም ተናግረዋል።

የህዝቡን ጥቅም እና ፍላጎት ለማደናቀፍ የሚንቀሳቀሱ አካላትን በሙሉ ለህግ የሚያቀርብ መሆኑንም ኮሚሽነር ጄነራል ከፍያለው ተናግረዋል።

በአሁኑ ወቅትም በክልሉ መረጋጋት መስፈኑን የገለፁ ሲሆን፥ ህዝቡን ከፀጥታ አስከባሪዎች ጎን ሆኖ ሳሙን ለማረጋገጥ እንዲሰራ ጥሪ አቅርበዋል።

You might also like
Comments
Loading...