Fana: At a Speed of Life!

በ22 ሳምንታት ጊዜ የሚወለዱ ህፃናት በህይወት የመኖር ዕድል አላቸው-ጥናት

አዲስ አበባ፣ ጥቅምት 17፣ 2012 (ኤፍ ቢ ሲ) በ22 ሳምንታት ወየም በ5 ወር ከሁለት ሳምንት ጊዜ የሚወለዱ ህፃናት በህይወት የመኖር ዕድል ያላቸውም መሆኑን አንድ ጥናት አመላክቷል።

በተፈጥሮ አንድ እናት ጤናማ የሆነ ህፃን ወልዳ ለማሳደግ ፅንሱ ከ36 እስከ 38 ሳምንታት ማለትም ለዘጠኝ ወራት ማህጸኗ ውስጥ መቆየት እንዳለበት ይታወቃል።

በሌላ በኩል በአንዳንድ ምከንያቶች የተነሳ ፅንስ ከሚጠበቅበት ጊዜ ዘግይቶ አሊያም ቀድሞ ሊወለድ ይችላል።

በዚህ መሰረትም በተፈጥሮ ከተቀመጠው የሰው ልጆች የእርግዝና ግዜ በተለየ መልኩ በ23 ሳምንታት እና ከዛ በላይ በሆነ ጊዜ ውስጥ የሚወለዱ ህፃናት በህይወት የመኖር ዕድል እንዳላቸው ከዚህ በፊት በጥናት ተረጋግጧል።

ይሁን እንጂ እስካሁን ከ23 ሳምንታት በታች በሆነ ጊዜ የሚወለዱ ሀፃናት በህይወት የመቆየት እድል ያላቸው ስለመሆኑ በጥናት አልተረጋገጠም ነበር።

አሁን ላይም በ22 ሳምንታት እድሜ ውስጥ የሚወለዱ ህፃናት ተገቢው የህክምና ክትትል ከተደረገላቸው በህይወት የመኖር እድል ያላቸው መሆኑን የብሪታኒያ የወሊድ ህክምና ባለሙያዎች ማህበር ባካሄደው ጥናት አስታውቋል።

ይሁን እንጂ በዚህ እድሜ ክልል ውስጥ የሚወለዱ ህፃናት በህይወት የመኖር እድላቸው ጠባብ መሆኑ ነው የተገለጸው።

በዚህ መሰረትም በተጠቀሰው ዕድሜ ክልል ውስጥ ከሚወለዱ ህፃናት ውስጥ ተገቢው የህክምና ክትትል ከተደረገላቸው ቢያንስ አንድ ሶስተኛ የሚሆኑት በህይወት የመኖር ዕድል ያላቸው መሆኑ በጥናቱ ተመላክቷል።

ለዚህም ባለሙያዎች ከዚህ በፊት ይጠቀሙበት ከነበረው የማዋለድ ሂደትና ስርዓት በተለየ መልኩ አዳዲስ ዘዴዎችንና መመሪያዎችን መጠቀም እንደሚጠበቅባቸው ተጠቁሟል።

በአንፃሩ ከ22 ሳምንታት ጊዜ በታች የሚወለዱ ህፃናት በህይወት የመኖር እድል የሌላቸው መሆኑ ተገልጿል።

ምክንያቱም ከ22 ሳምንታት ጊዜ በታች የሚወለዱ ህፃናት ሳንባቸው ተገቢውን የእስትንፋስ ስርዓት ለማከናወን አቅም የሌለው በመሆኑ ነው ተብሏል።

ምንጭ ፦ቢቢሲ

You might also like
Comments
Loading...