Fana: At a Speed of Life!

በወጪ ንግድ ገቢ በመጀመሪያው ሩብ ዓመት 723 ሚሊየን ዶላር ተገኘ

አዲስ አበባ ፣ ጥቅምት 19 ፣ 2012 (ኤፍ ቢ ሲ) በ2012 ዓ.ም በጀት ዓመት በሦስት ወራት የወጪ ንግድ ገቢ 723 ሚሊየን ዶላር መገኘቱን የንግድና ኢንዱስትሪ ሚኒስቴር አስታወቀ፡፡

ይህ አፈጻጸም ከአምናው ተመሳሳይ ወራት ጋር ሲነጻጸር በ95 ነጥብ 01 ሚሊየን የአሜሪካን ዶላር መጨመሩን ሚኒስቴሩ አስታውቋል፡፡

በበጀት ዓመቱ ሦስት ወራት 797 ነጥብ 78 ሚሊየን የአሜሪካን ዶላር ገቢ ለማግኘት  አቅዶ 723 ነጥብ 04 ሚሊየን አሜሪካን ዶላር መገኘቱ በሪፖርቱ ተመላክቷል፡፡

በመጀመሪያ ሩብ ዓመት በውጭ ምንዛሪ ገቢ ከተያዘላቸው ዕቅድ በላይ ያስመዘገቡ የወጪ ንግድ ምርቶች የተፈጥሮ ሙጫና ዕጣን፣ የብርዕና አገዳ እህሎች፣ አበባ፣ ኤሌክትሪክ እና ጫት ናቸው ፡፡

እንዲሁም የዕቅዳቸውን ከ75 በመቶ እስከ 99 በመቶ ያስመዘገቡ የወጪ ንግድ ምርቶች ደግሞ የጥራጥሬ ሰብሎች፣ ጨርቃ ጨርቅና አልባሳት፣ ቡና፣ የኬሚካልና የኮንስትራክሽን ግብዓት እና አትክልትና ፍራፍሬ መሆናቸው ተጠቁሟል።

የቅባት እህሎች፣ ኤሌክትሮኒክስ፣ ባህር ዛፍ፣ የቁም እንስሳት፣ ሰም፣ ስጋ፣ ታንታለም፣ ቆዳና የቆዳ ውጤቶች እና ወተትና የወተት ተዋፅኦ የእቅዳቸውን ከ50 በመቶ እስከ 74 በመቶ አስመዝግበዋል፡፡

በሌላ በኩል ከተያዘው ዕቅድ አንጻር በውጭ ምንዛሪ ገቢ ከ50 በመቶ በታች ገቢ ያስመዘገቡ የወጪ ንግድ ምርቶች ሻይ ቅጠል፣ ምግብ መጠጥና ፋርማስዩቲካልስ፣ ቅመማ ቅመም፣ ሌሎች ማዕድናት፣ ወርቅ፣ የስጋ ተረፈ ምርት፣ ማር፣ ብረታ ብረት እና አሳ ናቸው፡፡

የወጪ ንግድ አፈጻጸሙ እንዲጨምር የተጀመረው ሀገር በቀል የኢኮኖሚ ማሻሻያ የራሱን አስተዋጽኦ ማበርከቱ ተገልጿል፡፡

በወጪ ንግድ የተሰማሩ የዘርፉ ተዋናዮች በቅንጅት እና በጋራ ከተቋሙ ጋር ተቀራርበው እንዲሰሩ መደረጉ እና ላኪዎች ከዓለም የገበያ ዋጋ ምርትን አሳንሶ መሸጥ የሚያስጠይቅ እንደሆነና የወጪ ንግድ ኮንትራት አስተዳደር ለመምራት በወጣው መመሪያ ላይ ለላኪዎች ግንዛቤ መፈጠሩ ለወጪ ንግድ አፈጻጸም መሻሻል አስተጽኦ ማበርከቱ ተጠቅሷል፡፡

የሚላኩ የግብርና ምርቶችን መጠን መጨመር ፣ በጥራት ለገበያ ማቅረብ እና ለገበያ ያልቀረበውን የምርት ክምችት አሟጦ እንዲወጣ ማድረግ እና በቅንጅት መስራት፣ የማኑፋክቸሪንግ ምርቶችን አፈፃፀም ለማሻሻል ለድርጅቶች የቅርብ ክትትልና ድጋፍ ማድረግ አስተዋፅኦ አበርክተዋል፡፡

በአጠቃላይ የበጀት ዓመቱን ዕቅድ ለማሳካት እና የወጪ ንግዱን ከዚህ በበለጠ ለማሻሻል የተጀመሩ የሪፎርም ሥራዎችን በተቀናጀ አግባብ በተሟላ ሁኔታ ተጠናክሮ በመስራት፤ ከአምራቾች፣ ከአቅራቢዎችና ከላኪዎች ጋር ተቀናጅቶ በመተግበር የወጪ ንግዱን ገቢ ማሻሻል እንደሚገባ በሪፖርቱ ተገልጿል፡፡

You might also like
Comments
Loading...