Fana: At a Speed of Life!

በከተማ ደረጃ ለ 1 ነጥብ 5 ሚሊየን ወጣቶች ቋሚ የስራ እድል ለመፍጠር ታቅዷል

አዲስ አበባ፣ መስከረም 28፣ 2012 (ኤፍ.ቢ.ሲ) በዘንድሮው በጀት ዓመት በከተማ ደረጃ ለ 1 ነጥብ 5 ሚሊየን ወጣቶች ቋሚ የስራ እድል ለመፍጠር መታቀዱ ተገለፀ።

የፌዴራል የከተሞች የስራ እድል ፈጠራ እና ምግብ ዋስትና ኤጀንሲ ለፋና ብሮድካስቲንግ ኮርፖሬት እንደገለጸው የስራ እድሉ የሚፈጠረው በቅጥር እና በኢንተርፕራይዝ ነው።

በኢንተርፕራይዝ የስራ እድል ለሚፈጠርላቸው ዜጎችም 9 ቢሊየን ብር ብድር እንደተመቻቸላቸውም ነው ኤጀንሲው ያስታወቀው።

የፌዴራል የከተሞች የስራ እድል ፈጠራ እና ምግብ ዋስትና ኤጀንሲ ዳይሬክተር አቶ ንዋይ አልታየ፥ በዘንድሮ ዓመት ለ1 ነጥብ 5 ሚሊየን ወጣቶች በቋሚነት ለ300 ሺህ ወጣቶች ደግሞ በጊዜያዊነት የስራ እድል ለመፍጠር ታቅዷል ብለዋል።

የሚፈጠረው የስራ እድልም በሁለት አማራጮች መሆኑን ነው ዳይሬክተሩ የተናገሩት።

በመደበኛ እና በግዙፍ የመንግስት ፕሮጀክቶች ይፈጠራል ተብሎ ለታቀደው ቋሚ የስራ እድል በቀጥታ ቅጥር እና ኢንተርፕራይዝ በማቋቋም ነው የስራ እድል ለመፍጠር የታሰበው።

እንደ ኤጀንሲው እቅድም ከ185 ሺህ በላይ ኢንተርፕራይዞች በማቋቋም ለ800 ሺህ ወጣቶች የስራ እድል ይፈጠራል።

የስራ እድል ይፈጠርባቸዋል የተባሉት አምስት ዋና ዋና ዘርፎችም የማምረቻ፣ የከተማ ግብርና፣ የአገልገሎት፣ የኮንስትራክሽን እና የንግድ ዘርፎች ናቸው።

የቱሪዝም ዘርፉም በርካታ የስራ እድል ይፈጠርበታል የተባለ እና በትኩረት እየተሰራበት ያለ ዘርፍ መሆኑን ዳይሬክተሩ ተናግረዋል።

በዓመቱ ይፈጠራል ተብሎ ከታሰበው ቋሚ እና ጊዜያዊ የስራ እድል ፈጠራ ውስጥ በኦሮሚያ 440 ሺህ፣ በአማራ 314 ሺህ፣ በደቡብ 286 ሺህ እንዲሁም በትግራይ 110 ሺህ ወጣቶች የስራ እድል ይፈጠርላቸዋል ተብሏል።

ኤጀንሲው እንዳሳወቀው ከሆነ የስራ እድል ከሚፈጠርላቸው ወጣቶች ቅድሚያ ለምሩቃን የሚሰጥ ቢሆንም እንኳ ሁሉም ስራ ፈላጊ ወጣት የእድሉ ተጠቃሚ ይሆናል ተብሏል።

ስራውም በኤጀንሲው በሀገር አቀፍ ደረጃ በከተሞች በሚገኙ ከ 1 ሺህ 700 በላይ በሚሆኑ የአንድ ማዕከል አገልግሎት መስጫ ጣቢያዎች ከሀምሌ ወር ጀምሮ ምዝገባ ማከናወን ተጀምሯል።

ስራ አጥ ወጣቶችም በእነዚህ ጣቢያዎች በመሄድ መመዝገብ እና የስራ አማራጮችን ማየት እንዳለባቸው የተናገሩት አቶ ንዋይ ፥በጣቢያዎቹ ያልተመዘገበ ወጣት ግን ተጠቃሚ ሊሆን አይችልም ብለዋል።

ወደ ስራ ለሚመደቡ ወጣቶች ከመንግስት በቂ ድጋፍ የሚደረግላቸው መሆኑም ተመላክቷል።

ከመንግስት የሚደረገው ድጋፍ የስራ አማራጮችን ከመምረጥ ጀምሮ በሀገር አቀፍ ደረጃ ያሉ የስራ አማራጮችን ማሳወቅ ግንዛቤ መስጠት የሚሉትም ኤጀንሲው የሚያከናውናቸው ተግባራት ናቸው።

እንዲሁም ወደ ስራ ሲገቡ በኢንተርፕራይዝ ለሚደራጁት ለስራ መነሻ የሚሆናቸው ብድር የተመቻቸ ሲሆን፥ ለከተማ ግብርና የሚያገለግል 1 ሺህ 553 ሄክታር የለማ መሬትም መዘጋጀቱን ነው ዳይሬክተሩ የተናገሩት።

ከዚህ ባለፈም አዳዲስ የሚገነቡ 4 ሺህ 937 ሼዶች የሚቀርቡ ሲሆን፥ ከአሰራር ውጭ ተይዘው የነበሩ እና ተመላሽ የሆኑ ወደ 2 ሺህ የሚጠጉ ሼዶችም ዝግጁ ሆነዋል።

መሰረተ ልማት መሟላትን ብቻ የሚፈልጉ ከ 1 ሺህ 400 በላይ ሼዶችም ለዚሁ ተግባር የሚውሉ ሲሆን፥ በአጠቃላይ ለስራ መጀመሪያ ለወጣቶቹ 9 ቢሊየን ብር ብድርም ተመቻችቶላቸዋል።

ለወጣቶቹ የሚሰጠው የመነሻ ካፒታል ብድርም የፋይናንስ ስርዓቱን ተከትሎ የሚፈፀም መሆኑን ኤጀንሲው አስታውቋል።

በዙፋን ካሳሁን

You might also like
Comments
Loading...