Fana: At a Speed of Life!

በእነ ብርጋዴር ጀነራል ተፈራ ማሞ የምርመራ መዝገብ የተጠየቀው ተጨማሪ የምርመራ ጊዜ ውድቅ ተደረገ

አዲስ አበባ፣መስከረም 27፣2012 (ኤፍ ቢ ሲ) የባህር ዳር ጠቅላይ ፍርድ ቤት ዓቃቤ ህግ በእነ ብርጋዴር ጄኔራል ተፈራ ማሞ የምርመራ መዝገብ በሰበር አቤቱታ የተጠየቀውን ተጨማሪ የምርመራ ጊዜ ውድቅ አድርጓል።

ፍርድ ቤቱ መስከረም 21 ቀን 2012 ዓ.ም በዋለው ሰበር ችሎት ዓቃቤ ህግ በሰበር አቤቱታ በጠየቀው ተጨማሪ የምርመራ ጊዜ ዝርዝር ጉዳይ ላይ ብይን ለመስጠት ለዛሬ ተለዋጭ ቀጠሮ መስጠቱ ይታወሳል።

ፍርድ ቤቱ በዛሬው ዕለት በዋለው ሰበር ችሎትም መዝገቡ ተጨማሪ የምርመራ ጊዜ የማያሰጥ መሆኑን በመግለፅ የተጠየቀውን ተጨማሪ የምርመራ ጊዜ ውድቅ አድርጓል።

በዚህ መሰረትም ፍርድ ቤቱ መርማሪ ቡድኑ ይግባኝ ከጠየቀበት ጊዜ ጀምሮ ተጠርጣሪዎቹ ለ64 ቀናት በማረፊያ ቤት የቆዩ መሆናቸውን በመግለፅ፥ መርማሪ ቡድኑ በእነዚህ ጊዜያት ውስጥ መረጃ ሲያጣራ በመቆየቱ እንዲሁም ቀሪ ምስክሮች ጥቂት መሆናቸውን ግምት ውስጥ በማስገባት ጥቅምት 12 ቀን 2012 ዓ.ም ክስ እንዲመሠረት ትዕዛዝ በመስጠት መዝገቡን ዘግቷል።

በናትናኤል ጥጋቡ

You might also like
Comments
Loading...