Fana: At a Speed of Life!

በኢትዮጵያ የሚገኙ ህጻናትና ሴቶች ያሉበትን ሁኔታ የሚያሳይ ጥናት ይፋ ሆነ

 

አዲስ አበባ ፣ ጥቅምት 10 ፣ 2012 (ኤፍ ቢ ሲ) በገንዘብ ሚኒስቴር እና በተባበሩት መንግስታት ህጻናት መርጃ ድርጅት (ዩኒሴፍ) አማካኝነት በኢትዮጵያ የሚገኙ ህጻናትና ሴቶች ያሉበትን ሁኔታ የሚያሳይ ጥናት በዛሬው ዕለት ይፋ ተደርጓል።

ጥናቱን ለማካሄድ የአንድ ዓመት ጊዜ የወሰደ ሲሆን በዚህ አምስት ዓመት ውስጥ ኢትዮጵያ የህጻናትና ሴቶች ደህንነት ላይ፥ በጤና፣ ምገባ፣ ትምህርትና የህጻናት ጥበቃ ላይ መሻሻሎች አሳይታለች ነው የተባለው።

ጥናቱን ይፋ ያደረጉት የገንዘብ ሚኒስትር ዲኤታ አቶ አድማሱ ነበበ ኢትዮጵያ ባለፈው አስር ዓመት ተጨባጭ ለውጥ እንዳመጣች ገልጸዋል።

አያይዘውም ብዙ የሚሰሩ ቀሪ ስራዎች መኖራቸውን ጠቅሰው ከአጋሮች በሚገኝ ድጋፍ ቀሪ ስራዎቹን እንሰራለን ብለዋል።

የዩኒሴፍ ተወካይ አዲል ከድር በበኩላቸው መንግስት በህጻናት ላይ ሲሰራ ምን ያህል ለውጥ ማምጣት እንደሚቻል ያለፉት ሁለት አስርት ዓመታት ምስክር መሆናቸውን ጠቅሰዋል።

በጥናቱ ከአምስት ዓመት በታች ያሉ ህጻናት ሞት ባለፉት ሁለት አስርት ዓመታት በ2/3 ቀንሷል ተብሏል፤ ይሁን እንጅ በየዓመቱ 96 ሺህ ህጻናት ሲሞቱ 872 ሺህ የሚሆኑት ደግሞ ክትባት በአግባቡ አያገኙም።

58 በመቶ የነበረው የተመጣጠነ ምግብ የማያገኙ ህጻናት ቁጥር አሁን ላይ ወደ 37 በመቶ ቢቀንስም 5 ነጥብ 4 ሚሊየን የሚሆኑ ህጻናት ግን አሁንም በመቀንጨር የተጠቁ ናቸው።

የተቀመጠውን የዘላቂ ልማት ግብ ለማሳካትም አሁን እየተሰራ ያለውን ስራ በእጥፍ ማሳደግ እንደሚገባ በጥናቱ ላይ ተጠቅሷል።

በህጻናት ያለ እድሜ ጋብቻም በፈረንጆቹ 2005 ከነበረበት 60 በመቶ በ2016 ወደ 40 በመቶ ቀንሷል።

ይሁን እንጅ 15 ሚሊየን የሚሆኑ ህጻናት ያለ እድሜያቸው ያገቡ ሲሆን ከእነዚህ ውስጥ 6 ሚሊየን የሚሆኑት ከ15 ዓመት በታች ናቸው ተብሏል።

በ2030 ያለእድሜ ጋብቻን ለማስቀረት የተያዘውን እቅድ ለማሳካትም አሁን እየተሰራበት ካለው 6 እጥፍ መስራት እንደሚገባም በጥናቱ ተጠቁሟል።

በትምህርት ዘርፉም ዕድሜያቸው ለትምህርት ደርሶ ትምህርት ቤት የሚገቡ ህጻናት ቁጥር መጨመሩ ተነስቷል።

ከ10 የአንደኛ ደረጃ ትምህርት ቤት ተማሪዎች ውስጥ ስድስቱ ትምህርታቸውን ሲያጠናቅቁ፥ የተወሰኑት ሁለተኛ ደረጃ ትምህርታቸውን ይቀጥላሉ ነው የተባለው።

ይሁን እንጅ አሁንም ቢሆን ግን የማቋረጥ መጠኑ በተለያዩ ምክንያቶች ከፍተኛ መሆኑ ነው የተነሳው።

በአሁኑ ወቅትም 2 ነጥብ 6 ሚሊየን የሆኑና እድሜያቸው ከ7 እስከ 14 የሚሆኑ ህጻናት ወደ ትምህርት ቤት ያልገቡ ሲሆን፥ ከዚህ ውስጥ ከግማሽ በላይ የሚሆኑት ደግሞ ሴቶች ናቸው ተብሏል።

በመጠጥ ውሃና ንጽህና ከፍተኛ መሻሻል ሲታይ ንጽህናው ያልተጠበቀ ውሃ የሚጠጡ ሰዎች ቁጥርም ከ19 ዓመታት በፊት ከነበረበት 75 በመቶ በ2016 ወደ 31 በመቶ ዝቅ ብሏል።

 

 

በዘመን በየነ

 

You might also like
Comments
Loading...