Fana: At a Speed of Life!

በአክቲቪስት ጃዋር መሃመድ ላይ በመንግስትም ሆነ በፓሊስ በኩል ምንም ዓይነት እርምጃ እንዳልተወሰደ የፌዴራል ፖሊስ ገለፀ

አዲስ አበባ፣ ጥቅምት12፣ 2012 (ኤፍ ቢ ሲ) በአክቲቪስት ጃዋር መሃመድ ላይ በመንግስትም ሆነ በፓሊስ በኩል ምንም ዓይነት እርምጃ እንዳልተወሰደ የኢትዮጵያ ፌዴራል ፓሊስ ኮሚሽን አስታወቀ።

የኢትዮጵያ ፌዴራል ፓሊስ ኮሚሽን ኮሚሽነር ጀነራል እንደሻው ጣሰው በሰጡት መግለጫ፥ አክቲቪስት ጃዋር መሃመድ ለደጋፊዎቻቸውና ለተከታዮቻቸው ልታሰር ነው፤ጥቃት ሊደርስብኝ ነው በማለት መልዕክት ማስተላፋቸውን ገልፀዋል።

ሆኖም በአክቲቪስት ጃዋር መሀመድ ላይ በመንግስትም ሆነ በፓሊስ በኩል እርምጃ አልተወሰደም ብለዋል።

ግለሰቡ እንደተለመደው የየዕለት ተግባራቸውን እያከናወኑ ይገኛሉ ብለዋል ኮሚሽነሩ።

ፓሊስ ለውጡን ተከትሎ ወደ ሀገር የገቡ አክቲቪስቶች እና ፓለቲከኞች በሚኖሩበት አካባቢ ችግር እንዳያጋጥማቸው የጥበቃ ከለላ ሲያደርግ ቆይቷል ነው ያሉት።

በሀገሪቱ ያለው ሁኔታ እየተረጋጋ እና ሰላም እየተረጋገጠ በመምጣቱ እንደማንኛውም የህብረተሰብ ክፍል በሰላም መንቃሰቀስ እንደሚችሉ ከግንዛቤ በማስገባት የግል ጠባቂዎችን ስናነሳ ቆይተናል ነው ያሉት።

ለወደፊትም ባሉት አሰራሮች መሰረት አስፈላጊ በሆነበት እና ባልሆነበት ስፍራን በመለየት ይህ ስራ በፖሊስ ውስጥ ሲከናወን የነበረ ተግባር ነው፤ወደ ፊትም ይከናወናል ብለዋል።

በመሆኑም በየትኛውም ፓሊስ ሆነ አካል የተወሰደ እርምጃ እንደሌለ እና ህብረተሰቡም ይህንን በአግባቡ እንዲያውቅ እንፈልጋለን ነው ያሉት።

ወጣቶች፣ ህብረተሰቡ እና የፀጥታ አካላት የተዘጉ መንገዶች እንዲከፈቱ በማድረግ ህብረተሰቡ በሰላማዊ መንገድ እንዲንቀሳቀስ እንዲያደርጉ አሳስበዋል።

ህብረተሰቡ በየአካባቢው የሚፈጠሩ የፀጥታ ችግሮችን በመቆጣጠር የተጀመሩ የልማትና የሰላም ስራዎች እንዲቀጥሉ የየራሳቸውን ሚና እንዲወጡም ጥሪ አቅርበዋል።

You might also like
Comments
Loading...