Fana: At a Speed of Life!

በአሜሪካ በቱርክ ላይ ማዕቀብ እንዲጣል ግፊት እየተደረገ ነው

አዲስ አበባ፣ መስከረም 30፣ 2012 (ኤፍ.ቢ.ሲ) የአሜሪካ የህዝብ ተወካዮች ምክር ቤት አባላት የሆኑት ሪፐብሊካኖች ቱርክ በሶሪያ እየፈፀመችው ባለው ጥቃት ምክንያት በሀገሪቱ ላይ ማዕቀብ እንዲጣል ማቀዳቸው ተነግሯል፡፡

የምክር ቤቱ አባል የሆንቸው ሊዝ ቼኔይ ቱርክ በኩርድ አጋሮቻችን ላይ እየፈፀመች ላለው ጥቃት  ዋጋ መክፈል አለባት ሲሉ አሳስበዋል፡፡

የዲሞክራቲክ አባላት አብላጫውን በተቆጣጠሩት የህዝብ ተወካዮች ምክር ቤቱ ውስጥ የሚገኙ 29 የሪፐብሊካን አባላት ናቸው በአንካራ ላይ ማዕቀብ እንዲጣል ግፊት በማድረግ ላይ የሚገኙት፡፡

ይህ የሪፐብሊካን ፓርቲ አባላት ውሳኔ የተሰማው ፕሬዚዳንት ትራምፕ ሁለቱን ወገኖች ለማደራደር ሀሳብ እንዳላቸው መናገራቸውን ተከትሎ ነው፡፡

አሜሪካ በሰሜን ሶሪያ የነበሯትን ወታደሮች  ማስወጣቷን ተከትሎ  ቱርክ ወታደሮቿን በአካባቢው ማሰማራቷ ይታወሳል፡፡

ይህንን ተከትሎ ቱርክ በኣካባቢው በሚንቀሳቀሱት የኩርድ ታጣቂዎች ላይ ጥቃት በመክፈቷ በ10 ሺዎች የሚገመቱ ሰላማዊ ዜጎች አካባቢው ለቀው ለመውጣት ተገደዋል፡፡

የአሜሪካ ወታደሮች ከአካባቢው መውጣት ለቱርክ አረንጓዴ መብራት በመሆን ድንበር ላይ ጥቃት መፈፀም እንድትጀምር አስችሏታል ሲሉ እርምጃውን የሚቃወሙ አካላት ተናግረዋል፡፡

የቱርክ ፕሬዚዳንት ጣይብ ኤርዶጋር በሶሪያ በኩል ባለው የሀገራቸው ድንበር ላይ 480 ኪሎ ሜትር የሚሆን ሰላማዊ ዞን ለመፍጠር ጥቃቱን መፈፀም እንደጀመሩ ነው የሚነገረው፡፡

ድንበሩ  በኩርዱ ታጣቂ ቡድን የሶሪያ ዲሞክራሲያዊ ሀይል ቁጥጥር ስር የሚገኝ ሲሆን  ቱርክ ይህንን ሀይል በሽብርተኝነት ፈርጃዋለች፡፡

ይህ የሶሪያ ዲሞክራሲያዊ ሀይል አይ ኤስ በመዋጋት በሚደረገው ጥረት ዋነኛ የአሜሪካ አጋር የነበረ ሲሆን አሜሪካ ከጀርባ እየወጋኝ ነው በማለት ድምፁን አሰምቷል፡፡

ከዚህ ባለፈ ጥቃቱን ተከትሎ የዘር እልቂት እንዳይከሰት እና አይ ኤስ በአካባቢው መልሶ እንዳያንሰራራ ስጋትን ፈጥሯል፡፡

ምንጭ፡- ቢቢሲ

You might also like
Comments
Loading...