Fana: At a Speed of Life!

በቀጣዩ ሀገራዊ ምርጫ የሚሳተፉ የፖለቲካ ፓርቲዎች ሃላፊነት በተሞላበት መልኩ ሊንቀሳቀሱ ይገባል- ፕሬዚዳንት ሳህለወርቅ

አዲስ አበባ፣መስከረም 27፣2012 (ኤፍ ቢ ሲ) ሀገራዊ ምርጫና የምርጫ ባለድርሻ አካላት ሚና ዓለም አቀፍ ኮንፈረንስ በአዲስ አበባ ከተማ እየተካሄደ ነው።

በኮንፈረንሱ ላይ የፖለቲካ ፓርቲ ተወካዮች፣ የብሄራዊ ምርጫ ቦርድ አጋር አካላት፣ የሲቪክ ማህበራትና የመገናኛ ብዙሃን ተወካዮች እየተሳተፉ ይገኛሉ።

ኮንፈረንሱ ቀጣዩ ሀገራዊ ምርጫ ዴሞክራሲያዊ፣ ነፃ እና ተዓማኒነት ባለው መልኩ እንዲካሄድ የሚያስችሉ ተሞክሮዎችን በዘርፉ የካበተ ልምድ ካላቸው ሀገራት ለመቅሰም የሚያሰችል መሆኑ ተነግሯል።

ከዚህ ባለፈም በምርጫ ባለድርሻ አካላት መካከል  የሚኖረውን ትብብር ለመገንባት እና በምርጫው ሂደት ላይ ሊስተዋሉ የሚችሉ ችግሮችን በመለየት የመፍትሄ ሃሳብ ለማስቀመጥ ያስችላል ነው የተባለው።

በመድረኩ የመክፈቻ ንግግር ያደረጉት ፕሬዚዳንት ሳህለወርቅ ዘውዴ ቀጣዩን ሀገራዊ ምርጫ በተሳካ ሁኔታ ለማካሄድ በሃሳብ መወዳደርና የሌሎችን ሀገራት ተሞክሮ መውሰድ አስፈላጊ መሆኑን ተናግረዋል።

ከዚህ ባለፈም  ብሄራዊ ምርጫ ቦርድ የጀመራቸውን ማሻሻያዎች በማጠናከር ሂደቱን ተዓማኒና ዴሞክራሲያዊ በሆነ መልኩ እንዲጠናቀቅ የሚያስችል ብቁ የሰው ሃይል ማሟላት ይገባል ነው ያሉት።

የፖለቲካ ፓርቲዎች ሃላፊነት በተሞላበት መልኩ ሊንቀሳቀሱ ይገባል ያሉት ፕሬዚዳንቷ፥ ለውድድር የሚቀርቡ ሃሳቦች ሀገራዊ አንድነትን የሚያጠናክሩ ሊሆኑ እንደሚገባቸው አስገንዝበዋል።

ግልፅ፣ዴሞክራሲያዊ፣ ታዓማኒ እና  አሳታፊ ምርጫ ለማካሄድም  የሚመለከታቸው ባለድርሻ አካላት የበኩላቸውን ሚና እንዲወጡ ጥሪ አቅበዋል።

የብሄራዊ ምርጫ ቦርድ ሰብሳቢ ወይዘሪት ብርቱካን ሚዴቅሳ በበኩላቸው፥ ሀገራዊ ምርጫው ዴሞክራሲያዊ፣ግልፅ እና ተዓማኒ በሆነ መልኩ እንዲከናወን ከሚመለከታቸው አካላት ጋር በትብብርና በቅንጅት እየተሰራ መሆኑን ጠቁመዋል።

ተቋሙን ጠንካራ እና ገለልተኛ  ለማድረግም  የተለያዩ ቅድመ ዝግጅቶች እየከናወኑ መሆኑን  ነው የተናገሩት።

በአወል አበራ

 

 

You might also like
Comments
Loading...