Fana: At a Speed of Life!

በሀገሪቱ የሚስተዋለውን የደም እጥረት ለመቅረፍ ህብረተሰቡ ደም የመለገስ ባህሉን ሊያዳብር ይገባል-አቶ ርስቱ

አዲስ አበባ፣ ጥቅምት 14፣ 2012 (ኤፍ ቢ ሲ) በሀገሪቱ የሚስተዋለውን የደም እጥረት ለመቅረፍ ህብረተሰቡ ደም የመለገስ ባህሉን ሊያዳብር እንደሚገባ የደቡብ ክልል ምክትል ርዕሰ መስተዳድር አቶ ርስቱ ይርዳው ተናግረዋል።

ጥቅምት 15 ቀን በሀገር አቀፍ ደረጃ የሚካሄደውን 50ኛ ዓመት የደም ልገሳ ቀን ምክንያት በማድረግ የደቡብ ክልል ምክትል ርዕሰ መስተዳድር አቶ ርስቱ ይርዳው፣ የደኢህዴን ማዕከላዊ ኮሚቴ ጽህፈት ቤት ሃላፊ አቶ ሞገስ ባልቻ እንዲሁም የደቡብ ብሄሮች ብሄረሰቦችና ህዝቦች ክልል ምክር ቤት አፈ ጉባኤ ወይዘሮ ሄለን ደበበ ዛሬ ደም ለግሰዋል፡፡

የደቡብ ክልል ምክትል ርዕሰ መስተዳድር አቶ ርስቱ ይርዳው በሀገር አቀፍ ደረጃ የሚካሄደውን 50ኛ ዓመት የደም ልገሳ ቀን ምክንያት በማድረግ ዛሬ ደም ሲለግሱ እንደገለጹት፥ በሀገር አቀፍ ደረጃ እያጋጠመ ያለውን የደም እጥረት ችግር ለመቅረፍ ህብረተሰቡ ደም የመለገስ ባህሉን ሊያዳብር ይገባል ብለዋል፡፡

እናቶች በወሊድ ወቅት የሚያጋጥማቸውን የደም መፍሰስ እንዲሁም በትራፊክ አደጋ እና መሰል ጉዳቶች ደም የሚያስፈልጋቸው ዜጎች ቁጥር ከፍተኛ መሆኑን ጠቅሰው፥ ህዝቡ ደም በመለገስ ወገናዊ ሃላፊነቱን ሊወጣ እንደሚገባ አንስተዋል።

ሰዎችን መርዳት በፈጣሪም ዘንድ ታላቅ ተግባር መሆኑን የገለጹት ምክትል ርዕሰ መስተዳድሩ፥ የደም ባንኮች በሚፈልጉት መጠን ደም ማግኘት እንዲችሉ የክልሉ ህዝብ ደም እንዲለግስ ጥሪ አቅርበዋል፡፡

የደቡብ ብሄሮች ብሄረሰቦችና ህዝቦች ክልል ምክር ቤት አፈ ጉባኤ ወይሮ ሄለን ደበበ በበኩላቸው፥ እናቶች በወሊድ ወቅት የሚያጋጥማቸውን የደም መፍሰስ ችግር ለመከላከል ደም አስፈላጊ መሆኑን ገልጸዋል።

የለገሱት ደም ህይወትን ለማዳን ያለው ድርሻ ከፍተኛ ሚና የሚጫወት በመሆኑ ደስተኛ እንዳደረጋቸውም ነው የተናገሩት።

መላው ህብረተሰብ በዚህ ሰብዓዊ ተግባር እንዲሳተፍም አፈ ጉባኤዋ ጥሪ ማቅረባቸውን ከደቡብ ክልል ርዕሰ መስተዳድር ፕሬስ ሴክሬታሪያት  ፅህፈት ቤት ያገኘነው መረጃ ያመላክታል።

የደኢህዴን ማዕከላዊ ኮሚቴ ጽህፈት ቤት ሃላፊ አቶ ሞገስ ባልቻ ከማያልቀው የተፈጥሮ ደም በመለገስ የዜጎችን ህይወት መታደግ ከምንም በላይ አስፈላጊመሆኑን ጠቅሰዋል።

 

You might also like
Comments
Loading...