Fana: At a Speed of Life!

ሰንደቅ ዓላማ ትናንትን፣ ዛሬንና ነገን በአንድ አጣምሮ የያዘ ታሪክ ነጋሪ ነው- ፕሬዚዳንት ሳህለወርቅ

አዲስ አበባ፣ ጥቅምት 3፣ 2012 (ኤፍ.ቢ.ሲ) ሰንደቅ ዓላማ ትናንትን፣ ዛሬን እና ነገን በአንድ ጠምሮ የያዘ ታሪክ ነጋሪ መሆኑን የኢፌዴሪ ፕሬዚዳንት ሳህለወርቅ ዘውዴ ገለፁ።

12ኛው የሰንደቅ ዓላማ ቀን በዛሬው እለት “ሰንደቅ አላማችን የብዝሀነታችን ድምር ውጤትና የአንድነታችን ምሰሶ ነው” በሚል መሪ ቃል በመከበር ላይ ይገኛል።

በኢፌዴሪ በኢፌዴሪ የህዝብ ተወካዮች ምክር ቤት ቅጥር ግቢ ውስጥ በተካሄደው የሰንደቅ ዓላማ ቀን ላይም የኢፌዴሪ ፕሬዚዳንት ሳህለወርቅ ዘውዴ፣ የህዝብ ተወካዮች ምክር ቤት ምክትል አፈ ጉባዔ ወይዘሮ ሽታዬ ምናለ እና የፌደራል ጠቅላይ ፍድር ቤት ፕሬዚዳንት ወይዘሮ መአዛ አሸናፊን ጨምሮ የህዝብ ተወካዮችና የፌዴሬሽን ምክር ቤት አባላት ተገኝተዋል።

የኢፌዴሪ ፕሬዚዳንት ሳህለወርቅ ዘውዴ በሰንደቅ ዓላማ ቀን አከባበሩ ላይ ተገኝተውም የእንኳን አደረሰን መልእክት ያስተላለፉ ሲሆን፥ ዛሬ የምናከብረው ቀን በብዙ መልኩ እንድምታው ሰፊ ነው ብለዋል።

ኢትዮጵያ በሰንደቅ አላማ ረጅም ታሪክ ካላቸው ሀገራት መካከል የምትቆጠር ነች ያሉት ፕሬዚዳንቷ፥ ሰንደቅ ዓላማ ትናንት፣ ዛሬን እና ነገን በአንድነት አጣምሮ የያዘ ታሪክ ነጋሪ መሆኑን ገልፀዋል።

ከሁሉም በላይ ሰንደቅ አላማ ልዩነት ቢኖር እንኳን የብሄራዊ አንድነት፣ የመግባባት እና የእርቅ መልእክት እንዲሁም የዘር፣ የሀይማኖት እና የአስተሳሰብ ልዩነቶችን በጋራ የሚይዝ መሆኑን ተናግረዋል።

ሰንደቅ አላማ የብሄራዊ ማንነት መገለጫ ለማለት የሚያስችሉ ዋና ዋና ምክያቶች ብዙ ናቸው ሲሉም ፕሬዚዳንት ሳህለወቅር ገልፀዋል።

ሰንደቅ አላማ ሀገርን ይወክላል ያሉት ፕሬዚዳንቷ፥ በተጨማሪም ሰንደቅ ዓላማ የሉአላዊነት፣ የሀገር ፍቅር እና የዜግነት እንዲሁም ሀገር የተመሰረተችበት እሴት መገለጫ መሆኑንም አንስተዋል።

በየዓመቱ የሚከበረው በዓል የሰንደቅ ዓላማ ክብረን በሚመልስ መልኩ ሊከበር እንደሚገባውም ነው ፕሬዚዳንት ሳህለወርቅ ያሳሰቡት።

ስለሰንደቅ ዓላማ ክብር ትውልድን ማስተማር እና በሁሉም ቦታ ክፍ ብሎ እንዲውለበለብ ማድረግ ይገባል ያሉ ሲሆን፥ ይህ ሲደረግም ነው ብሄራዊ አንድነታችን የሚገለፀው ብለዋል።

የኢፌዴሪ የህዝብ ተወካዮች ምክር ቤት ምክትል አፈ ጉባዔ ወይዘሮ ሽታዬ ምናለም ለበዓሉ የእንኳን አደረሳችሁ መልእክት አስተላልፈዋል።

ወይዘሮ ሽታዬ በንግግራቸው፥ የሰንደቅ ዓላማ ቀን በኢፌዴሪ ህገ መንግስት አንቀፅ 3 የተቀመጠውን የብሔራዊ ሰንደቅ ዓላማ ትርጓሜ መሰረት በማድረግ የወጣ የሰንደቅ ዓላማ አዋጅ ቁጥር 654/2001 እንዲሁም በተሻሻለው አዋጅ ቁጥር 863/2006 አንቀጽ 2 መሰረት እንደሚከበር ገልፀዋል።

ሰንደቅ ዓላማ ለኢትዮጵያ ልዩ ትርጉም አለው ያሉት ወይዘሮ ሽታዬ፥ የኢትዮጵያ ሰንደቅ አላማ የነጻነት፣ የዘመን ተሻጋሪ ድል፣ የእኩልነት እና የዴሞክራሲ ድል ምልክት መሆኑንም አንስተዋል።

12ኛውን የሰንደቅ ዓላማ ቀን ስናከበር በህገ መንግስትም ሆነ በኣዋጅ እውቅና ያገኘ ሰንደቅ ዓላማን መጠቀም ተገቢ ይሆናል ሲሉም አሳስበዋል።

በሙለታ መንገሻ

You might also like
Comments
Loading...