Fana: At a Speed of Life!

ም/ር/መ አቶ ርስቱ ይርዳው ከብሔራዊ ዕርቀ ሰላም ኮሚሽን አባላት ጋር ተወያዩ

አዲስ አባበ፣ጥቅምት 03፣2012 (ኤፍ ቢ ሲ) የደቡብ ክልል ምክትል ርዕሰ መስተዳድር አቶ ርስቱ ይርዳው በዛሬው ዕለትየብሔራዊ ዕርቀ ሰላም ኮሚሽን አባላትን  በጽህፈት ቤታቸው ተቀብለው አነጋግረዋል፡፡

በዚህ ወቅትም የዕርቅና የሰላም ጉዳይ ጊዜ የማይሰጠው በመሆኑ የሀገር ሽማግሌዎች፣ የሃይማኖት አባቶች እና ታላላቅ ሰዎች በሚፈጠሩ ችግሮች ዙሪያ የበኩላቸውን እንዲወጡ ምክትል ርዕሰ መስተዳድር አቶ ርስቱ ይርዳው አሳስበዋል።

ከትውልድ ወደ ትውልድ ሲሻገሩ የመጡ ቁርሾዎችንና አለመግባባቶችን አክመን ለተተኪው ትውልድ ኢትዮጵያ የፍቅር፣ የመግባባትና ሁሉም ዜጎቿ በእኩል ተባብረው የሚኖሩባት ሀገር አድርገን የምናስረክብበት ጊዜው አሁን መሆኑንም አንስተዋል።

ክልሉ የበርካታ ብሔር ብሔረሰቦች መገኛ ነው ያሉት ምክትል ርዕሰ መስተዳድሩ ፥ እነዚህ ህዝቦች የደረጀ ባህል ያላቸው እና የተለያዩ ባህላዊ የግጭት አፈታት ስርዓት እና አብሮነትን የሚያጠናክሩበት ዕሴቶች ያሏቸው በመሆኑ ይህንን አውጥተን እና አጉልተን ለሰላም ልንጠቀምበት እንደሚገባም ጠቁመዋል ፡፡

በህዝቡ ዘንድ የሚፈጠሩ አለመግባባቶችን በውይት በመፍታት እና ከእልህ ወጥተን ተደጋግፈን በጋራ ለሰላም ለመስራት በየደረጃው የሚገኙ የሀይማኖት አባቶችን፣ የሀገር ሽማግሌዎችን እና ወጣቶችን በመጠቀም ለችግሮች መፍትሄ መሻት ትኩረት የሚሰጠው ተግባር መሆኑን አክለዋል።

የክልሉን ሰላም ማስፈንና መግባባት መፍጠር፣ አብሮነትን ማጠናከር፣ የተፈጠሩ ግጭቶችን በዕርቅ መፍታት ከሁሉም ቅድሚ ተሠጥቶት እየተሰራ መሆኑንም አመላክተዋል።

በዚህም አመርቂ ውጤት እየታየበት መሆኑን የገለጹት ምክትል ርዕሰ መስተዳድሩ ፥ የእርቀ ሰላም ኮሚሽን ድጋፍም የበለጠ አቅም እንደሚሆን መናገራቸውን ከደቡብ ክልል ርዕሰ መስተዳድር ፕሬስ ሴክሬታሪያት ፅህፈት ቤት ያገኘነው መረጃ ያመላክታል።

ብጹዕ ካርዲናል ብርሀነ እየሱስ ሱራፌል የኢትዮጵያ ካቶሊካዊት ቤተክርስቲያን ሊቀ ጳጳስና የብሔራዊ እርቀ ሰላም ኮሚሽን ሰብሳቢ በበኩላቸው፥ ኢትዮጵያ በህዝቦቿ አንድነትና ጥረት በልጽጋና አንድነቷ ተጠብቆ ሰላሟ እንዲረጋገጥ ዕውነትና ፍትህ ላይ ያተኮረ ዕርቀ ሰላም ማድረግ ተገቢ መሆኑን አንስተዋል።

ኮሚሽኑ ዘርፈ ብዙ ጠቀሜታ ያለው በመሆኑ  የገለጹት ብጹዕ ካርዲናል ብርሀነ እየሱስ፥ ይህም መንግስት የሰላም፣ የልማት ፖሊሲዎችንና ስትራቴጂዎችን በሚፈለገው ፍጥነትና የጥራት ደረጃ ተግባራዊ ለማድረግ የሚያስችለው መሆኑን ጠቁመዋል።

ከዚህ ባለፈም  ፖለቲካዊ፣ ማህበራዊ እና ኢኮኖሚያዊ ውጤቶችን በቀላሉ ለማስመዝገብ የሚያስችሉ ምቹ ሁኔታዎችን ለመፍጠር ያስችላል ነው ያሉት ።

 

You might also like
Comments
Loading...