Fana: At a Speed of Life!

ምክር ቤቱ በነገው ዕለት መደበኛ ጉባኤውን ያካሂዳል

አዲስ አበባ፣ መስከረም 28፣ 2012(ኤፍ.ቢ.ሲ) የሕዝብ ተወካዮች ምክር ቤት 5ኛ ዓመት የስራ ዘመን 1ኛ መደበኛ ስብሰባውን መስከረም 29 ቀን 2012 ዓ.ም ያካሂዳል፡፡

በዚህም ፕሬዚዳንት ሳህለወርቅ ዘውዴ መስከረም 26 ቀን 2012 ዓ.ም ለሕዝብ ተወካዮችና ለፌዴሬሽን ምክር ቤቶች የጋራ መደበኛ ስብሰባ ላይ ያደረጉትን የመክፈቻ ንግግር አስመልክቶ የቀረበን የድጋፍ ሞሽን እንደሚያደምጥ ነው የተነገረው፡፡

ምክር ቤቱ የመድን ሥራ አዋጅን ለማሻሻል፣የአነስተኛ ፋይናንስ ሥራ አዋጅን ለማሻሻል፣የፌዴራል ድጎማ በጀትና የጋራ ገቢዎች ስርዓትና ተቋማዊ አደረጃጀትን ለመወሰን፣የፌዴራል ማረሚያ ቤት ረቂቅ አዋጅ እና በሰው የመነገድ እና ሰውን በሕገ-ወጥ መንገድ ድንበር የማሻገር ወንጀልን ለመከላከልና ለመቆጣጠር የቀረቡ ረቂቅ አዋጆችን መርምሮ ለሚመለከታቸው ቋሚ ኮሚቴዎች ይመራል፡፡

ከፈረንሳይ የልማት ኤጀንሲ ጋር ለልማት ፖሊሲ ፕሮግራም ማስፈፀሚያ የተደረገውን የብድር ስምምነት እና ከአረብ ባንክ ለአፍሪካ ኢኮኖሚ ልማት ጋር ለዲላ-ቡሌ-ሃሮ ዋጩ መንገድ ስራ ፕሮጀክት ማስፈፀሚያ የተደረገውን የብድር ስምምነት ለማጽደቅ የቀረቡ ረቂቅ አዋጆችን መርምሮ ለሚመለከታቸው ቋሚ ኮሚቴዎች እንደሚመራም ነው የሚጠበቀው፡፡

በተጨማሪም ከነዳጅ አምራችና ላኪ አገራት ፈንድ ለአለም አቀፍ ልማት ጋር ለዲላ-ቡሌ-ሃሮ ዋጩ መንገድ ስራ ፕሮጀክት ማስፈፀሚያ እና ከአለም አቀፍ የልማት ማህበር ጋር ለቆላማ አካባቢዎች የኑሮ ማሻሻያ ፕሮጀክት ማስፈፀሚያ የተደረጉ የብድር ስምምነቶችን ለማጽደቅ የቀረቡ ረቂቅ አዋጅን መርምሮ ለሚመለከታቸው ቋሚ ኮሚቴዎች ምክር ቤቱ ይመራል ተብሏል፡፡

ምክር ቤቱ በሚያካሂደው መደበኛ ጉባኤ ላይ ሌሎች ስምምነቶችንም ለሚመለከታቸው ቋሚ ኮሚቴዎች እንደሚመራም ነው የተነገረው፡፡

You might also like
Comments
Loading...