Fana: At a Speed of Life!

ለመሶብ ታዎር ሌግዤሪ ሆቴል ግንባታ ፕሮጀክት የመግባቢያ ስምምነት ተፈረመ

አዲስ አበባ፣ ጥቅምት 01፣ 2012 (ኤፍ ቢ ሲ) የመሶብ ታዎር ሌግዤሪ ሆቴል ግንባታ ፕሮጀክት ለማስጀመር የሚያስችል የመግባቢያ ስምምነት ተፈረመ።

ባለመሶብ ታዎር ሌግዤሪ ሆቴል የግንባታ ፕሮጀክት ሕጋዊ ሰውነት ኖሮት የሚንቀሳቀስበትን እና ወደ ግንባታ ሥራ የሚያስገባውን የመግባቢያ ሰነድ የባህልና ቱሪዝም ሚኒስቴር ከሀሳብ አመንጪ ኢንጅነሮች ጋር በዛሬው ዕለት በስካይ ላይት ሆቴል ተፈራርሟል።

በፊርማ ስነ ሥርዓቱ ላይ የተገኙት የባህልና ቱሪዝም ሚኒስትር ዶክተር ሂሩት ካሳው ፥ የመሶብ ታዎር ሌግዤሪ ሆቴል ሕንፃ ዲዛይን በዓይነቱ ለየት ያለ እና የሀገሪቱን ባህል የሚያንጸባርቅ እንዲህም የህዝቦችን ሀሳብና ስሜት የሚገዛ ነው ብለዋል።

መሶብ በአለላ አሠራሩ የእኛ ሳይንስ፤ የኛ ፊዚክስ ነው ያሉት ሚኒስትሯ፥ የፕሮጀክቱ ሀሳብ መገለጫችን የሆነውን አብሮ የመብላት እና የመጠጣት ባህልን የሚያሳይ መሆኑን አንስተዋል።

ስለሆነም ፕሮጀክቱን በፍጥነት ለማጠናቀቅ ሁሉም ባለድርሻ አካላት ድጋፍ በማድረግ በሀሳብና በገንዘብ የበኩለቸውን ድርሻ እንዲወጡ ጥሪ አቅርበዋል።

የመሶብ ታዎር ሌግዤሪ ሆቴል ዲዛይን የኢትዮጵያ ኪነ-ሕንፃ ታሪክ የመነጨ ሀሳብ የያዘ ሲሆን፥ የጎን ስፋቱ 90 ሜትርና ከፍታው 290 ሜትር፣ ከመሬት በታች ባለ6 እና ከመሬት በላይ ባለ70 ወለል ሕንፃ ያለው መሆኑ ታውቋል፡፡

ለፕሮጀክቱ ግንባታም የ20 ቢሊየን ብር ካፒታል ኢንቨስትመንት እንደሚያስፈልገው በፊርማ ስነ ስርዓቱ ላይ ተገልጿል።

You might also like
Comments
Loading...