Fana: At a Speed of Life!

2011 ኢትዮጵያ በፈተና እንደማትወድቅ ያስመሰከረ ነው ‐ ጠ/ሚ ዶ/ር አብይ

አዲስ አበባ፣ ጳጉሜን 6፣ 2011 (ኤፍ ቢ ሲ) 2011 ኢትዮጵያ በፈተና እንደማትወድቅ ያስመሰከረ መሆኑን የኢፌዴሪ ጠቅላይ ሚኒስትር ዶክተር አብይ አህመድ ገለፁ።

ጳጉሜን በመደመር የብሄራዊ የአንድነት ቀን የማጠቃለያ እና የአዲስ ዓመት የዋዜማ ስነ ስርዓት በብሄራዊ ቤተመንግስት ተከናውኗል።

በዚህ ስነ ስርዓት ላይ የአዲስ ዓመት መልካም ምኞት መልዕክትን ያስተላለፉት ጠቅላይ ሚኒስትር ዶክተር አብይ፥ የተሰናበትነው 2011 ዓመተ ምህረት የሀገሪቱ የዘመናት የቁልቁለት ጉዞ እንዳይቀጥል የተደረገበት መሆኑን አንስተዋል።

አሁንም ወደ ተስፋ ሰጪ ብልፅግና አልተሸጋገርንም ያሉት ጠቅላይ ሚኒስትሩ፥ አዲስ ዓመት ማለት ያልተነካ አዲስ ሀብት ማለት እንደመሆኑ መጠቀምም፤ ማባከንም ይቻላል ብለዋል።

ሆኖም ኢትዮጵያውያን መልካሙን በመምረጥ ከጎናችን እንደሚቆሙ እምነት አለኝ ነው ያሉት።

ጊዜ ወደፊት የሚሄድ በመሆኑ ማጠራቀም የማንችለው ሀብት እንደመሆኑ ወቅትን አስቀድሞ አውቆ መጠቀም ይገባል ሲሉም መክረዋል።

2012 ለእጣ ፈንታችን መሰረት የምንጥልበት ዓመት ነው ያሉት ጠቅላይ ሚኒስትር ዶክተር አብይ፥ በቀጣይ 10 ዓመት ወደ ብልፅግና የሚመራን ብቻ ሳይሆን ለ100 ዓመታት የቀና መንገድ የምንጀምርበትም ይሆናል ብለዋል።

እስከ 2030 በአፍሪካ ታላላቅ ኢኮኖሚ ካላቸው አምስት ሀገራ መካከል ኢትዮጵያ አንዷ እንድትሆን እንደሚሰራም ነው በንግግራቸው የጠቆሙት።

በአጠቃላይ 2012 የመፈፀም ዓመት ይሆናል በማለትም የእርቅና ሰላም ሂደት የሚጠናቀቅበት፣ በእቅድ መሰረት የሚካሄደው ምርጫ ሀገሪቱን ወደ ላቀ ዴሞክራሲ የሚያሻጋግርበት እና አረንገዴ አሻራን ከችግኝ ወደ ዛፍ ለማሸጋር የምንከባከብበት የሆናል ሲሉ ለአብነት አንስተዋል።

አዲሱን ዓመት ችግር ሆኑ ነገሮችን ወደ እድል በመሰላ የምንቀይርበት ሊሆን ይገባልም ብለዋል።

ሀገራዊ ሰላም መለያችን ሆኖ ሊገለጥ እና የፍቅር ጎህ ሊወጣ ይገባል ያሉት ጠቅላይ ሚኒስትር ዶክተር አብይ፥ በፍቅር፣ በለጋስነትና በቅንነት በቤታችንና በደጃፋችን ያለውን ሰላም ወደ መንድር፣ ወደ ማህበረስብ እና ወደ ሀገር በመውሰድ ሀገራዊ ገፅታ ልናለብሰው ይገባልም ነው ያሉት።

ኢትዮጵያውያን በአዲሱ ዓመት በልቦናቸውና በአዕምሯቸው ያለውን ፀጋ በመጠቀም በይቅርታና ደግነትን ጥላቻን እንዲደፉ ጥሪ አቅርበዋል።

የኢትጵያን ህልውና የሚገዳደር የትኛውንም ጥረት ኢትዮጵያውያን በመደመር የሚከላከሉትም ይሆናል ብለዋል በመልዕክታቸው።

 

 

 

 

 

You might also like
Comments
Loading...