Fana: At a Speed of Life!

ፕሬዚዳንቷ ለታዳሽ ሃይል ልማት ለታዳጊ ሀገራት ቃል የተገባው የገንዘብ ድጋፍ በወቅቱ እንዲቀርብ ጠየቁ

አዲስ አበባ፣ መስከረም 12፣ 2012 (ኤፍ ቢ ሲ)  በአለም አቀፍ ደረጃ ወደ ታዳሽ ሃይል የሚደረገው ሽግግር ፈጣንና የተሳካ እንዲሆን በአየር ንብረት ይበልጥ ተጎጂ ለሆኑት ታዳጊ ሀገራት ቃል የተገባው የገንዘብ ድጋፍ በወቅቱና በበቂ ሁኔታ ማድረስ ቁልፍ ሚና እንዳለው ፕሬዝደንት ሣህለ ወርቅ ዘውዴ ተናገሩ።

ኢትዮጵያ ወደ ታዳሽ የሃይል ምንጮች አጠቃቀም ለመሸጋገር የምታደርገውን ጥረትም ለማሳካት የዘረጋችው የብሄራዊ ኤሌክትሪፊኬሽን ፕሮግራም መልካም ውጤት በማሳየቱ የአለም ባንክ ወደ ሌሎች ታዳጊ ሀገራት እያስፋፋው መሆኑንም አመልክተዋል።

ፕሬዝደንት ሣህለ ወርቅ ዘውዴ ለ74ኛው የተባበሩት መንግስታት ድርጅት ጠቅላላ ጉባኤ ኒዮርክ ይገኛሉ።

ፕሬዚዳንቷ በታዳሽ የሃይል አጠቃቀም ሽግግር ላይ አተኩሮ የሚመክረው ስብሰባ ማጠናቀቂያ ላይ በመገኘት  ባደረጉት ንግግር በአለም አቀፍ ለጋሾች በአውሮፓውያኑ 2030 ኤሌክትሪክ ለሁሉም ለማዳረስ መግባባት ላይ የተደረሰው በአመት 52 ቢሊዮን ዶላር ድጋፍ እንደሚያስፈልግ ነበር።

እስካሁን ማግኘት የተቻለው ግን በአመት 30 ነጥብ 2 ቢሊዮን ዶላር ብቻ ነው ነው ያሉት ፕሬዚዳንት ሳህለ ወርቅ፥ ልዩነቱ አርባ በመቶ መሆኑ ሲታይ ደግሞ ከፊት ለፊት ያለውን ተግዳሮት የሚያስገነዝብ ነው ብለዋል።

ስለሆነም የአየር ንብረት ለውጥ የሚያስከትላቸውን ቀጥተኛ እና የጎንዮሽ ጉዳቶችን ለመከላከል የተገባው የገንዘብ ድጋፍ በወቅቱ እና በበቂ ሁኔታ ሊደርስ እንደሚገባ አስገንዝበዋል።

በፈረንጆቹ በ2030 ኢትዮጵያን ጨምሮ ታዳጊ ሀገራት አስተማማኝ እና ዘመናዊ ወደሆነ ታዳሽ ሀይል አጠቃቀም ሙሉ በሙሉ ለመሸጋገር የተያዘውን እቅድም ፕሬዝደንቷ ለተሰብሳቢዎቹ አስታውሰዋል።

ከዚህ አንጻር ኢትዮጵያ በ2025 አሁን በገጠርና በከተማ ያለውን 44 በመቶ የኤሌክትሪክ አቅርቦት ወደ መቶ በመቶ ለማሳደግ አነስተኛ ወጪን የሚከተል ብሄራዊ የኤሌክትርፊኬሽን ፕሮግራም ይፋ ማድረጓን ነው የገለጹት።

ፕሮግራሙ በኢትዮጵያ ባመጣው መልካም ውጤት የተነሳም የአለም ባንክ በሌሎች ታዳጊ ሀገራት እንዲተገበር እያደረገ መሆኑንም በንግግራቸው መጥቀሳቸውን ከፕሬዚዳንት ፅህፈት ቤት ያገኘነው መረጃ ይጠቁማል።

You might also like
Comments
Loading...