Fana: At a Speed of Life!

ጠቅላይ ሚኒስትር ዶ/ር አብይ በዴሞክራሲ ስርዓት ግንባታ ዘርፍ በአፍሪካ የፖለቲካ አማካሪዎች ማኅበር ተሸለሙ

አዲስ አበባ፣ ጳጉሜን 5፣ 2011 (ኤፍ.ቢ.ሲ) ጠቅላይ ሚኒስትር ዶክተር አብይ አህመድ በኢትዮጵያ ለዴሞክራሲ ሥርዓት ግንባታ ላበረከቱት አስተዋጽኦ የአፍሪካ የፖለቲካ አማካሪዎች ማኅበር ሽልማት አበረከተላቸው።

የአፍሪካ የፖለቲካ አማካሪዎች ማኅበር አራተኛ ጉባኤውን “የምርጫ ቅስቀሳ ፋይናንስና ምርጫ በአፍሪካ” በሚል መሪ ሃሳብ በአዲስ አበባ እያካሄደ ነው።

የማኅበሩ ፕሬዚዳንት ኬሂንዳ ባሚግቤታን እንደተናገሩት፥ ጠቅላይ ሚኒስትር ዶክተር አብይ በኢትዮጵያ የዴሞክራሲ ማሻሻያ አድርገዋል።

በርካታ የፖለቲካ ፓርቲዎችና እስረኞች እንዲፈቱና በውጭ የሚኖሩ የፖለቲካ ፓርቲ አባላት ወደ አገራቸው በነጻነት እንዲመለሱ ማድረጋቸውን ገልጸዋል።

ወደ ሀገራቸው ከመጡ በኋላም ከፖለቲከኞቹ ጋር ተቀራርበው መስራታቸውንና ከምሁራን ጋርም የፖለቲካ ከባቢ መፍጠራቸውን ለአብነት ጠቅሰዋል።

በመሆኑም ማኅበሩ ይህንን ተግባራቸውን ከግምት በማስገባት የአፍሪካ የዓመቱ የዴሞክራሲ ተሸላሚ እንዲሆኑ መወሰኑን ነው የጠቆሙት።

ጠቅላይ ሚኒስትሩ ያመጧቸውን አዎንታዊ ለውጦች ለማስቀጠል መሥራት እንዳለባቸውም የማኅበሩ ፕሬዚዳንት ተናግረዋል።

ማኅበሩ ከዚህ ቀደም ለሁለት ናይጄሪያዊ ፖለቲከኞች ተመሳሳይ ሽልማት ሰጥቷል፤ ጠቅላይ ሚኒስትር ዶክተር አብይ ይህንን ሽልማት ሲቀበሉም ሦስተኛ ግለሰብ ናቸው ብለዋል።

ማኅበሩ በአፍሪካ በፖለቲካ ጉዳዮች ላይ የኃሳብ ልውውጥ ልምድ ለማዳበርና በምርጫ ሥርዓት ላይ ያሉ ስልቶችንና ልምዶችን ለመለዋወጥ ይሰራል።

ጎን ለጎንም በፖለቲካ ጉዳዮች ላይ ጥናትና ምርምር በማድረግ በአፍሪካ የዴሞክራሲ ሥርዓት እንዲዳብር እየሰራ የሚገኝ ማኅበር ነው።

ምንጭ፦ ኢዜአ

You might also like
Comments
Loading...