Fana: At a Speed of Life!

ጌዴኦ፣ ጉጂ፣ አማሮና ቡርጂ አካባቢዎች ወደ ቀደመ ሰላማቸው መመለሳቸውን በማስመልከት የችግኝ ተከላ ተካሄደ

አዲስ አበባ፣ ነሃሴ 29፣ 2011 (ኤፍ.ቢ.ሲ) የጌዴኦ፣ ጉጂ፣ አማሮና ቡርጂ አካባቢዎች የነበረው የፀጥታች ችግር ተቀርፎ ወደ ቀደመ ሰላማቸው መመለሳቸውን በማስመልከት የችግኝ ተከላ ተካሄደ፡፡

ይህን የችግኝ ተከላ መርሃ ግብር የሰላም ሚኒስቴር እና የአደጋ ስጋት ስራ አመራር ኮሚሽን የተዘጋጀ ሲሆን፥ ተከላው በጌዴኦና በምዕራብ ጉጂ አዋሳኝ አካባቢዎች ተካሂዷል፡፡

የጌዴኦ፣ ጉጂ፣ አማሮና ቡርጂ ተወካዮች፣ አባገዳዎች፣ የሃገር ሽማግሌዎች እና የሃይማኖት መሪዎች በተገኙበት ነው የችግኝ ተከላ መርሃ ግብሩ የተካሄደው፡፡

የሃይማኖት መሪዎች ከመረቁ እና የአብሮነት መልዕክት ካስተላለፉ በኋላ የጌዴኦ፣ ጉጂ፣ አማሮና ቡርጂ ተወካዮች የቀደመ ተሳስቦና ተፋቅሮ የመኖር ባህሉ ይቀጥል ዘንድ ችግኝ ተክለዋል፡፡

በመርሃ ግብሩ ላይ የጌዴኦ ተፈናቃዮች በምዕራብ ጉጂ ዞን በሚገኘው ቀርጫ ወረዳ እና በሌሎች አካባቢዎች ሙሉ ለሙሉ መመለሳቸውን የአደጋ ስጋት ስራ አመራር ኮሚሽን ምክትል ኮሚሽነር አቶ ዳመነ ዳሮታ ተናግረዋልል፡፡

የጌዴኦ ተፈናቃዮች በአሁኑ ወቅት በመኸር እርሻ እንቅስቃሴ ውስጥ እንደሚገኙ የተገለፀ ሲሆን፥ ኮሚሽኑ ምርት እስከሚደርስላቸው ድረስ የምግብና ሌሎች ድጋፎችን እያደረገ እንደሚገኝ ተነግሯል፡፡

ከዚህ ባለፈም በመላ ሀገሪቱ በጎርፍ እና በሌሎች ምክንያት ከቀሩት ጥቂት ተፈናቃዮች በስተቀር አብዛኛዎቹ ወደ ቀደመ ቀያቸው መመለሳቸውንም ገልፀዋል፡፡

በፀጋየ ንጉስ

You might also like
Comments
Loading...