Fana: At a Speed of Life!

የ12ኛው መላው አፍሪካ ጨዋታ የተሳታፊ ልዑክ አቀባበል ተደረገለት

አዲስ አበባ፣ ነሃሴ 27፣ 2011 (ኤፍ.ቢ.ሲ) የ12ኛው መላው አፍሪካ ጨዋታ የተሳታፊ ልዑክ በአዲስ አበባ ስታዲየም ይፋዊ አቀባበል ተደረገለት፡፡

በሞሮኮ ራባት በተካሄደው የ12ኛው የመላ አፍሪካ ጨዋታዎች ተሳትፎ በጥሩ ውጤት ትናንት ምሽት ላይ ለተመለሰው የኢትዮጵያ ልዑክ ቡድን ዛሬ ከጠዋቱ 3፡00 ሰዓት ጀምሮ በአዲስ አበባ ስታዲየም ደማቅ አቀባበል ተደርጎለታል።

የኢትዮጵያ ስፖርት ኮሚሽን ምክትል ኮሚሽነር አቶ ጌታቸው ባልቻ፣ የኢትዮጵያ ኦሎምፒክ ኮሚቴ ፕሬዚዳንት ዶክተር አሸብር ወልደጊዮርጊስ እና ከኢትዮጵያ አትሌቲክስ ፌዴሬሽን የተውጣጡ አካላት በአቀባበል ስነ ስርዓቱ ላይ ታድመዋል፡፡

የስፖርት ኮሚሽን ምክትል ኮሚሽነር አቶ ጌታቸው ባልቻ ለቡድኑ የእንኳን ደስ አላችሁ መልዕክት አስተላልፈዋል።

አትሌቶቹ ለዚህ ስኬት ላደረጉት አስተዋጽኦ ከፍተኛ ክብር እና ምስጋ እና ይገባችኋል፣ እንኳን በድል ተመለሳችሁ ሲሉ ምስጋናቸውን አቅርበዋል።

ከኢትዮጵያ ኦሊምፒክ ኮሚቴና ከሀገር አቀፍ ስፖርት ማህበራት ጋር በጋራ አስቀድሞ በማቀድ ሲሰራ መቆየቱ ለዚህ ድል ማብቃቱን አንስተዋል፡፡

ለስፖርት ቡድኑ ወደፊት የእውቅና አሰጣጥ ፕሮግራም እንደሚኖርም ነው የተናገሩት፡፡

የኢትዮጵያ ኦሊምፒክ ኮሚቴ ፕሬዚዳንት እና የልዑካን ቡድኑ መሪ ዶክተር አሸብር ወ/ጊዮርጊስ በበኩላቸው ውጤቱ እጅግ ሞቃታማ በሆነ የአር ሁኔታ በተደረገ ውድድር የተገኘ ነው ብለዋል፡፡

ተወዳዳሪዎቹ ይህን የአየር ጸባይ ተቋቁመው ያስመዘገቡት ውጤት እጅግ የሚያኮራና የተገንኘው ድል ጥሩና የሚያበረታታ እንደሆነም ነው የሚናገሩት፡፡

ይህን ተሞክሮ በመገምገም ልምድ በመውሰድ እና በመቀመር፣ ደካማ ጎንን በማስተካከል በቶኪዮ ኦሎምፒክም የተሻለ ውጤት ለማምጣት ቅድመ ዝግጅት ማድረግ እንደሚጠበቅም ነው ገለጹት፡፡

ለአትሌቶች፣አሰልጣኖች፣ቴክኒክ ባለሞዎች ፣ቡድን መሪዎች፣የሚዲያ ባለሞያዎች ባጠቃላይ ለዚህ ድል መመዝገብ ከፍተንኛ አስተዋጽኦ ላበረከቱ በሙሉ ታላቅ ምስጋናን በኦሎምፒክ ኮሚቴው ስም አቅርበዋል።

የስፖርት ልዑኩ በሞሮኮ 12ኛው የመላ አፍሪካ ጨዋታዎች 6 የወርቅ፣ 5 የብር እና 12 የነሃስ ሜዳሊያዎች አስመዝግቧል፡፡

በ13 የስፖርት አይነቶች በመሳተፍ በአፍሪካ 9ኛ ደረጃ በመያዝ ውድድሩን ማጠናቀቁ ይታወሳል፡፡

You might also like
Comments
Loading...