Fana: At a Speed of Life!

የጎንደር ዩኒቨርሲቲ የግዕዝ ቋንቋን በመጀመሪያ ዲግሪ ሊሰጥ ነው

አዲስ አበባ ፣ መስከረም 2፣ 2012 (ኤፍ ቢ ሲ) የጎንደር ዩኒቨርሲቲ የመጥፋት አደጋ የተጋረጠበትን የግዕዝ ቋንቋን ለመታደግ በአዲሱ የትምህርት ዘመን በመጀመሪያ ዲግሪ ለመስጠት መዘጋጀቱን አስታወቀ።

የዩኒቨርሲቲው የአካዳሚክ ምክትል ፕሬዚዳንት ዶክተር ካሳሁን ተገኘ ለኢዜአ እንደተናገሩት፥ ኢትዮጵያ የግዕዝ ቋንቋ ባለቤት ብትሆንም ለቋንቋው ማደግና መስፋፋት የተሰጠው ትኩረት አነስተኛ ነው።

በዚህ ሳቢያም ቋንቋው የመጥፋት አደጋ የተጋረጠበት ከመሆኑም በላይ በግዕዝ ቋንቋ የተጻፉ በርካታ የብራና መጽሃፍትን ለጥናትና ምርምር ስራ ማዋል አልተቻለም ብለዋል።

ዘመናት የተሻገሩና በቋንቋው የተጻፉ ለዘመናዊ ህክምና ሙያ የሚያግዙ ፣ ምጣኔ ሀብታዊ፣ ባህላዊና ታሪካዊ ፋይዳ ያላቸው በርካታ መጽሃፍቶች በኃይማኖት ተቋማትና ገዳማት ተወስነው እንደሚገኙም ተናግረዋል።

ዩኒቨርሲቲው እነዚህን ቁሳዊና መንፈሳዊ እሴት የያዙ መጽሃፍት ከትውልድ ወደ ትውልድ እንዲሸጋገሩ ለማድረግ ስርዓተ ትምህርት ተቀርጾና መምህራን ተቀጥረው የግዕዝ ቋንቋን ለማስተማር ዝግጅት ተደርጓል ነው ያሉት።

በትምህርት ዘመኑ 50 ተማሪዎችን ተቀብሎ ለማስተማር ዝግጅት መደረጉን ጠቅሰው፥ ትምህርቱ በማታውና በክረምት መርሃ ግብሮች እንደሚሰጥም አስረድተዋል።

You might also like
Comments
Loading...