Fana: At a Speed of Life!

የግል የመድህን ዋስትና ዘርፍ ለሃገር ኢኮኖሚ እያበረከተ ያለውን አስተዋጽኦ ማሳደግ እንደሚገባ ባለሙያዎች ገለጹ

አዲስ አበባ ፣ መስከረም 7 ፣ 2012 (ኤፍ ቢ ሲ) የግል የመድህን ዋስትና ዘርፍ ለሃገር ኢኮኖሚ እያበረከተ ያለውን አስተዋጽኦ ማሳደግ እንደሚገባ ፋና ብሮድካስቲንግ ኮርፖሬት ያነጋገራቸው የዘርፉ ባለሙያዎች ገለጹ።

ከሁለት አስርት አመታት ያልዘለለው የግል መድህን ዋስትና ዘርፍ በሚጠበቀው ልክ ለኢኮኖሚው አስተዋጽኦ እያበረከተ እንዳልሆነ ይነገራል።

በሃገሪቱ ካለው ሰፊ የህዝብ ቁጥር እና የኢኮኖሚው መነቃቃት አንጻር ዘርፉ አሁን ላይ ያለበት ደረጃ በርካታ ውስንነቶች አሉበትም ነው የሚባለው።

በዘርፉ በግል የመድህን ዋስትና ውስጥ የሚሰሩ ባለሙያዎችም እንደሚሉትም፥ በሃገሪቱ ውስጥ የግሉ ዘርፍ መድህን ዋስትና አገልግሎት ሰጪ ተቋማት ተደራሽነታቸው ጥያቄ ውስጥ የሚገባ ነው።

ለዘርፉ ያለው ግንዛቤ አናሳነት እና ኩባንያዎች ማህበረሰቡን ያገናዘቡ አገልግሎቶችን በሚፈለገው መጠን ማቅረብ አለመቻላቸው ዘርፉ በተገቢው መልኩ እንዳያድግ እንዳደረገውም ይናገራሉ።

ኢትዮጵያ የመድህን ዋስትና ውሎችን አልያም አረቦን በመሸጥ በአመት የምታገኘው ገቢ ከ300 ሚሊየን ዶላር እንደማይበልጥ ባለሙያዎቹ ይገልጻሉ።

ይህ ቁጥር ደግሞ ሃገሪቱ ካላት አቅም አንጻር ዝቅተኛ የሚባል ሲሆን፥ ጎረቤት ኬንያ መስኩን በማሳደግ በአመት ከምታገኘው ከ1 ነጥብ 5 ቢሊየን የአሜሪካ ዶላር በላይ ጋር ሲነጻጸርም አነስተኛ መሆኑን እንደማሳያ ያቀርባሉ።

የመድህን ዋስትና ኩባንያዎች ከሚሰጡት ከተማ ተኮር አገልግሎት አብዛኛው ተገልጋይ የንብረት መድህን አገልግሎት ተጠቃሚ መሆኑን መረጃዎች ያመላክታሉ።

የህይዎት መድህን ሽፋን ከጠቅላላው አመታዊ የመድህን ዋስትና አገልግሎት ከ6 በመቶ አይበልጥም፥ ይህም ከጎረቤት ሃገራት ጋር ሲነጻጸር ዝቅተኛ የሚባል ነው።

ባለሙያዎችም በቴክኖሎጅ የተደገፈ አገልግሎትን በማስፋፋት ከከተማ ተኮር የመድህን አገልግሎት በተጨማሪ አገልግሎቱ ለገጠሩ ክፍል የሚዳረስበትን መንገድ ማመቻቸት ይገባል ይላሉ።

ከዚህ ባለፈም ኩባንያዎች ለግብርናው መስክ የሚሆኑ የመድህን አገልግሎቶችን ማቅረብ እንደሚገባቸውና፥ ጊዜውን ያልዋጁ የመድህን ዋስትና ውሎችን ማስተካከል እንደሚገባም አንስተዋል።

በተጨማሪም በመንግስት በኩል በዘርፉ የሌሎች ሃገራት ተቋማት ወደ ሃገር ውስጥ ገብተው በጋራ የሚሰሩበት መንገድ  ቢመቻች መልካም መሆኑንም ከጣቢያችን ጋር ባደረጉት ቆይታ ገልጸዋል።

 

በአወል አበራ

 

You might also like
Comments
Loading...