Fana: At a Speed of Life!

የደቡብ ሱዳን ተቀናቃኝ ሃይሎች ጊዜያዊ የሽግግር መንግስት ለመመስረት ተስማሙ

አዲስ አበባ ፣ጳጉሜን 6 ፣ 2011 (ኤፍ ቢ ሲ) የደቡብ ሱዳን ተቀናቃኝ ሃይሎች ጊዜያዊ የሽግግር መንግስት ለመመስረት ተስማሙ።

የሃገሪቱ ፕሬዚዳንት ሳልቫ ኪር እና የቀድሞው ተቀዳሚ ምክትል ፕሬዚዳንትና የአማጽያኑ መሪ ሪክ ማቻር በጁባ የፊት ለፊት ውይይት አድርገዋል።

በውይይታቸውም በመጭው ህዳር ወር በሃገሪቱ ጊዜያዊ የሽግግር መንግስት ለመመስረት መስማማታቸውን የደቡብ ሱዳን ማስታወቂያ ሚኒስትር ማይክል ማኩዬ ሉዬት ገልጸዋል።

ሚኒስትሩ ሁለቱ አካላት በተወሰኑ ጉዳዮች ላይ ተወያይተው በመጭው የፈረንጆቹ ህዳር 12 ጊዜያዊ የሽግግር መንግስት ለመመስረት በመርህ ደረጃ መስማማታቸውንም ተናግረዋል።

በውይይታቸው ወቅትም በህገ መንግስት ማሻሻያ፣ በፀጥታ ህጎች እና በሃገሪቱ ሊኖር ስለሚገባው ክልላዊ አስተዳደር ዙሪያ መክረዋልም ነው ያሉት።

ሃገሪቱ ከሶስት አመታት የሽግግር ጊዜ በኋላም ምርጫ የማካሄድ እቅድ እንዳላትም ተገልጿል።

በፈረንጆቹ 2011 ከሱዳን ተነጥላ ሉዓላዊ ሃገር የሆነችው ደቡብ ሱዳን ሁለት አመት በማይሞላ ጊዜ ውስጥ ወደ እርስ በርስ ግጭት ገብታ ሰላም ከራቃት ከራርማለች።

በወቅቱ ለተፈጠረው ግጭት ሳልቫ ኪር ሪክ ማቻርን ከስልጣን ማንሳታቸው መሆኑም ይነገራል።

የቀድሞው ተቀዳሚ ምክትል ፕሬዚዳንት ሪክ ማቻርም ከትናንት በስቲያ ጁባ መግባታቸው ይታወሳል።

የሃገሪቱ ተቀናቃኝ ሃይሎች የተፈጠረውን አለመረጋጋት እልባት ለመስጠት የሰላም ስምምነት ቢፈራረሙም ተግባራዊ ሳያደርጉት ቆይተዋል።

ለዚህም ሳልቫ ኪር የታጠቁ ሃይሎችን ትጥቅ በማስፈታት ስምምነቱን ገቢራዊ ለማድረግ የገንዘብ እጥረት አለብኝ የሚል ምክንያት ሲያቀርቡ ቆይተዋል።

አሁን በሁለቱ ሃይሎች መካከል የተደረሰው ስምምነት ለደቡብ ሱዳናውያን ተስፋን ይዞ የሚመጣ ይመስላል።

 

 

ምንጭ፦ ሬውተርስ

You might also like
Comments
Loading...