Fana: At a Speed of Life!

የዓለም የሰላም ቀን እየተከበረ ነው

አዲስ አበባ፣ መስከረም 10፣ 2012 (ኤፍ.ቢ.ሲ) አለም አቀፍ የሰላም ቀን በተባበሩት መንግስታት ድርጅት አባል ሃገራት ዘንድ በዛሬው እለት በመከበር ላይ ይገኛል።

የዘንድሮው የሰላም ቀንም “የአየር ንብረት ለውጥን መከላከል ለሰላም” በሚል መሪ ሀሳብ ነው በመከበር ላይ የሚገኘው።

የኢፌዲሪ የሰላም ሚኒስቴር የዓለም የሰላም ቀንን አስመልክቶ በትናንትናው እለት ባወጣው መግለጫ፥ ለመላው ኢትዮጵያውያን እንኳን ለአለም የሰላም ቀን አደረሳችሁ ብሏል።

ሚኒስቴሩ በመግለጫው፥ አለምዓቀፍ የሰላም ቀን በየዓመቱ በመስከረም ወር ሲከበር የሰላምን ሀሳቦች በሀገራት እና በህዝቦች ዘንድ በማስረፅ ሁሉም ባለድርሻ አካላት ወደ ሰላም የሚወስዱንን መንገዶች ይበልጥ አጠናክረው እንዲቀጥሉ ለማሳሰብም ጭምር መሆኑንም አስታውቋል።

የዘንድሮው የሰላም ቀን መሪ ሀሳብ በግልፅ እንደሚያመለክተው የአካባቢ ጥበቃ ስራዎችን በመስራትና የአየር ንብረት ለውጥን በመከላከል ሰላምን ማረጋገጥ እንደሚገባ አስታውቋል።

የአየር ንብረት ለውጥ በሚያስከትላቸው ችግሮች በአለማችን ላይ በሚሊዮን የሚቆጠሩ ዜጎች የመኖሪያ ቀያቸውን ለቀው እንዲሰደዱ ሲያደርግ ቆይቷል ያለው ሚኒስቴሩ፥ በሀገራችንም የአየር ንብረት ለውጥ ለሚያስከትላቸው ችግሮች የተጋለጡ በርካታ የህብረተሰብ ክፍሎች ይገኛሉ ብሏል።

በኢትዮጵያ የአካባቢ ጥበቃ ስራ ለሀገር ግንባታችንና ለሰላም ያለውን ጠቀሜታ በመረዳት ባለፉት አመታት መጠነ ሰፊ የአረንጓዴ ልማት መርሀ ግብር መከናወኑንም አስታውቋል።

በተለይ ባሳለፍነው ክረምት ከ4 ቢሊየን በላይ ችግኞችን በሀገሪቱ በመትከል የአየር ንብረት ለውጥን ለመከላከል መንግስት ቁርጠኝነቱን አሳይቷል ብሏል መግለጫው።

የዘንድሮውን የአለም የሰላም ቀን አስበን ስንውል እንደመሪ ቃሉ ሁሉ የአየር ንብረት ለውጥን ለመከላከል ተግባራዊ ምላሽ በመስጠት ሰላም የሰፈነባትን ኢትዮጵያ ለማረጋገጥ በሀገር አቀፍ ደረጃ የተከልናቸውን ችግኞች መንከባከብ እንዲሁም የአካባቢ ጥበቃ ስራዎችን ማጠናከር እንደሚገባን ጥሪ አቅርቧል።

You might also like
Comments
Loading...