Fana: At a Speed of Life!

የውጭ ጉዳይ ሚኒስትሩ ከደቡብ ሱዳን አቻቸው ጋር ተወያዩ

አዲስ አበባ፣ መስከረም 4፣ 2012 (ኤፍ.ቢ.ሲ) የኢፌዴሪ የውጭ ጉዳይ ሚኒስትር አቶ ገዱ አንዳርጋቸው ከደቡብ ሱዳን አቻቸውን አውት ዴንግ አኩዊል ጋር ትናንት ማምሻውን ተወያይተዋል።

በውይይታቸውም በደቡብ ሱዳን ጁባ በቅርቡ በፕሬዚዳንት ሳልቫ ኪር እና በዶክተር ሪክ ማቻር መካከል ውይይት መካሄዱ ለደቡብ ሱዳን ብሎም ለአካባቢው ሠላም ያለው ፋይዳ እጅግ የላቀ መሆኑን ገልጸዋል።

የሁለቱ መሪዎች ፊት ለፊት ተገናኝቶ መወያየትም በሀገሪቱ ዘላቂ ሰላም ለማስፈንና በተቀናቃኝ ወገኖች የተቀመጠውን የሰላም ፍኖተ ካርታ ለመተግበር ወሣኝ ምዕራፍ መሆኑን አስታውቀዋል።

የደቡብ ሱዳን የውጭ ጉዳይ ሚኒስትር አውት ዴንግ አኩዊል በበኩላቸው፥ በደቡብ ሱዳን እየታየ ያለው ፈጣን የፖለቲካ ለውጥ በአፍሪካ ቀንድ እየነፈሰ ካለው የተስፋና የሰላም አየር ጋር አብሮ የሚሄድ መሆኑን አንስተዋል።

አያይዘውም በለውጡ የደቡብ ሱዳን ህዝብ እጅግ ደስተኛ መሆኑን ተናግረዋል።

የሁለቱ መሪዎች ውይይትም በደቡብ ሱዳን የደህንነትና የፖለቲካ ሁኔታዎች ዙሪያ ለመመካከር መልካም አጋጣሚን መፍጠሩን ነው ያመለከቱት።

ለቀጣዩ ሂደትም ጎረቤት ሃገሮችና የምስራቅ አፍሪካ የልማት በይነ መንግስታ (ኢጋድ) የድጋፍ ሚናቸውን አጠናክረው እንዲቀጥሉ ጥሪ ማቅረባቸውን የውጭ ጉዳይ ሚኒስቴር ቃል አቀባይ ፅህፈት ቤት አስታውቋል።

You might also like
Comments
Loading...