Fana: At a Speed of Life!

የኢፌዴሪ ምዕራብ ምድብ አየር ሃይል የተሟላ የመስሪያ ህንጻውን አስመረቀ

አዲስ አበባ፣ መስከረም 10 ፣2012 (ኤፍ ቢ ሲ) የኢዴዴሪ ምዕራብ ምድብ አየር ሃይል የተሟላ የመስሪያ ህንጻውን በዛሬው ዕለት አስመርቋል።

በምርቃት ስነ ስርዓቱ ላይ የኢፌዴሪ አየር ሃይል ዋና አዛዥ ብርጋዴር ጀነራል ይልማ መርዳሳ፣ የኢፌዴሪ ጦር ኃይሎች ጠቅላይ ኢታማጆር ሹም ጀነራል አደም መሀመድ፣የአማራ ክልል ርዕሰ መስተዳድር አቶ ተመስገን ጥሩነህና ሌሎች የመንግስት የስራ ሃላፊዎች ተገኝተዋል።

የኢፌዴሪ አየር ኃይል ምዕራብ አየር ምድብ ኃላፊ ኮሎኔል ቸርነት መንገሻ 24 ሰዓት የአየር ክልሉንና ቀጠናውን ጥበቃ ለማድረግ በቴክኖሎጂና በዕውቀት እየተሻሻለ መሆኑን አንስተዋል።

ኮሎኔል ቸርነት የምድቡ ማስፋፊያ ግንባታ ስር ነቀል ተቋማዊ ለውጥ በማድረግ ላይ ላለው መከላከያ ተጨማሪ ጉልበት እንደሚሆንም አክለዋል።

በሚግ 23 ቅርፅ የተሠራው አዲሱ የማስፋፍያ ሕንጻ በርካታ ወታደራዊ አገልግሎቶችን ያቀፈ እንደሆነም ተነግሯል።

የአማራ ክልል ርዕሰ መስተዳድር ተመስገን ጥሩነህ በክልሉ አንፃራዊ ሠላም እንዲሰፍን መከላከያ ከፍተኛ እገዛ ማድረጉን በመግለፅ አመሥግነዋል።

መከላከያው በፖለቲካ ልምሻ ምክንያት ከተፈጠረው የመንደር ስምሪት ወጥቶ ትልልቅ ጉዳዮች ላይ አተኩሮ እንዲሰራ ማሳሰባቸውን አብመድ ዘግቧል።

ሠራዊቱን መከታ በማድረግ ፍላጎታቸውን ማስፈፀም ለሚፈልጉ ህልመኞች ሠራዊቱ መጠቀሚያ መሆን እንደሌለበትም ነው የተናገሩት።

ፖለቲከኞች በሐሳብ በተለያዩ ቁጥር መሳሪያ አስነግቶ በሕዝብ ላይ ጥይት ማስተኮስ ነውረኛ ተግባር ነው ያሉት አቶ ተመስገን፥ ሠራዊቱ የሌላ ፖለቲካ ተሸካሚ ከመሆን ራሱን ሊጠብቅ ይገባል ብለዋል።

የኢፌዴሪ አየር ኃይል ምዕራብ አየር ምድብ የዕውቀትና የቴክኖሎጂ ልህቀት ማዕከል ሆኖ የሀገሪቷን ሕዋና የአየር ክልል ከማንኛውም ጥቃት በአስተማማኝነት መጠበቅ ራዕይ ያደረገ ነው።

You might also like
Comments
Loading...