Fana: At a Speed of Life!

የአፍሪካ መሪዎች በሮበርት ሙጋቤ የስንበት ስነ ስርዓ ላይ ለመታደም ሐረሬ እየገቡ ነው

አዲስ አበባ፣መስከረም 3፣2012 (ኤፍ ቢ ሲ) የተለያዩ የአፍሪካ መሪዎች በቀድሞው የዚምባቡዌ ፕሬዚዳንት የስንብት ስነ ስርዓት ላይ ለመገኘት ዚምባቡዌ ዋና ከማ ሀረሬ እየገቡ ነው።

ዚምባቡዌን ከሶስት አስርት ዓመታት በላይ ያስተዳደሩት የቀድሞ ፕሬዚዳንት ሮበርት ጋብሬል ሙጋቤ የቀብር ስነ ስርዓት በዛሬው ዕለት ይፈጸማል።

ከቀብር ስነ ስርዓቱ በፊት በሚደረገው የስንብት መርሃ ግብር ላይም የደቡብ አፍሪካው ፕሬዚዳንት ሲሪል ራማፎሳን ጨምሮ ከ12 ባላይ የሚሆኑ የአፍሪካ መሪዎች ይገኛሉ ተብሎ ይጠበቃል።

እስካሁንም የኢኳቷሪያል ጊኒ ፕሬዝዳንት ቲዮዶር ኦቢያንግ ሐራሬ የገቡ ሲሆን ፥በዚህ ወቅትም ሮበርት ሙጋቤን  ለአፍሪካ  በርካታ ተሞክሮዎችን ያካፈሉ ቁርጠኛና ለአላማቸው ፅኑ የነበሩ መሪ ሲሉ አወድሰዋቸዋል።

የስንብት መርሃ ግብሩ ሀረሬ በሚገኘው ብሄራዊ ስታዲየም የሚካሄድ ሲሆን፥ በስነ ስርዓቱ የሚታደሙ ህዝቦችም የዛኑ ፒ ኤፍ ፓርቲ መለያ ቀለም የተቀቡ ልብሶችን የሚለብሱ ይሆናል።

በስንብት መርሃ ግብሩ ላይ የሀገሪቱ ፕሬዝዳንት ኤመርሰን ምናንጋግዋ በቀድሞ መሪያቸው ሞት ሐዘን ለገባቸው ዜጎች ንግግር ያደርጋሉ ተብሎ ይጠበቃል።

የዚምባቡዌ የቀድሞው ፕሬዝዳንት ሮበርት ሙጋቤ አስክሬን ሐራሬ በሚገኘው የሀገሪቱ ብሔራዊ ጀግኖች ሥርዓተ ቀብር መፈጸሚያ ሃውልት እንደሚያርፍ ታውቋል።

ሮበርት ሙጋቤ ዚምባቡዌ ነጻነቷን ካገኘችበት እንደ አውሮፓውያኑ አቆጣጠር ከ1980 ጀምሮ ለ37 ዓመታት ሲያስተዳድሩ ቆይተዋል።

ሮበርት ሙጋቤ ከየካቲት ወር ጀምሮ ሲንጋፖር በሚገኝ ሆስፒታል በህክምና ሲረዱ ቆይተው በሳለፍነው ሳምንት ከዚህ ዓለም በሞት መለየታቸው ይታወሳል።

ዚምባቡዌን ለረጅም ዓመታት የመሩት ሮበርት ሙጋቤ እንደ አውሮፓውያኑ አቆጣጠር በህዳር ወር 2017 ላይ ነበር በወታደራዊ መፈንቅለ መንግስት ከስልጣናቸው የተነሱት።

ምንጭ ፦ቢቢሲ

You might also like
Comments
Loading...