Fana: At a Speed of Life!

የአየር ንብረት ለውጥ እያደረሰ ያለውን ተፅዕኖ የሚቃወም ሰልፍ በተለያዩ ሃገራት እየተካሄደ ነው

አዲስ አበባ ፣ መስከረም 9 ፣ 2012 (ኤፍ ቢ ሲ) በአየር ንብረት ላይ እየደረሰ ያለውን ለውጥ የሚቃወም ሰልፍ ከ130 በላይ በሆኑ ከተሞች እየተካሄደ ነው።

ሰልፉ በዋናነት የአየር ንብረት ለውጥ እያደረሰ ያለውን ተፅዕኖ በመቃወም አውስትራሊያን ጨምሮ በአህጉራችን አፍሪካ፣ አውሮፓና እስያ በበርካታ ከተሞች ነው እየተካሄደ የሚገኘው።

ሰልፈኞቹ የአየር ንብረት ለውጥ በኒውዮርክ በሚካሄደው የተመድ ጠቅላላ ጉባኤ ዋነኛ አጀንዳ እንዲሆን ጠይቀዋል።

ሰልፉ በአየር ንብረት ለውጥ ተቆርቋሪዎች፣ በተለያዩ የሲቪክ ማህበራት፣ በበጎ ፈቃደኞች እንዲሁም በተማሪዎች የተዘጋጀ ነው ተብሏል።

በዚህም መሪዎች ለአየር ንብረት ለውጥ የተግባር ስራ እንዲያከናውኑ ጠይቀዋል።

በፈረንጆቹ 2030ም ወደ ከባቢ አየር የሚለቀቀውን የካርበን መጠን ዜሮ ለማድረግ የተገባው ቃል ይተግበርም ብለዋል ሰልፈኞቹ።

በፈረንሳይ መዲና የተደረሰው የፓሪስ ስምምነትም በአግባቡ ሊተገበርና ሊፈጸም እንደሚገባም ነው የጠየቁት።

“የምንኖርበት ሌላ ፕላኔት” የለንም ሲሉም ሃገራትና መሪዎቻቸው ለአየር ንብረት ልዩ ትኩረት እንዲሰጡ አጽንኦት ሰጥተዋል።

የአየር ንብረት ለውጥ አሁን ላይ ትልቁ የምድራችን ፈተና መሆኑን የዘርፉ ተመራማሪዎች ይናገራሉ።

በቅርቡ ግሪንላንድ በአንድ ተራራማ ስፍራ የነበረ የበረዶ ንጣፍ ሙሉ በሙሉ ያጣች ሲሆን፥ የበረዶ የቅልጠት ፍጥነቱም ከፍተኛ መሆኑ ይነገራል።

 

ምንጭ፦ ሲ ኤን ኤን እና ቢቢሲ

 

You might also like
Comments
Loading...