Fana: At a Speed of Life!

የናይጀሪያ ጦር ለቦኮሃራም ድጋፍ ያደርጋል ያለውን የረድኤት ድርጅት ዘጋ

አዲስ አበባ፣ መስከረም 9፣ 2011 (ኤፍ.ቢ.ሲ) የናይጀሪያ ጦር ለቦኮሃራም የምግብና መድሃኒት ድጋፍ ያደርጋል ያለውን የረድኤት ድርጅት ዘጋ።

ጦሩ “አክሽን አጌንስት ሃንገር” የተሰኘው ድርጅት ለቦኮሃራም ድጋፍ ያደርጋል በሚል ወንጅሎታል።

ከዚህ ቀደምም ድርጅቱ በናይጀሪያ ሰሜን ምስራቅ ክፍል ለአሸባሪው የቦኮሃራም ታጣቂዎች የመድሃኒት እና ምግብ ግብዓት በማቅረብ ከሃገሪቱ መከላከያ ማስጠንቀቂያ እንደተሰጠው ተገልጿል።

ውንጀላውን ውድቅ ያደረገው የረድኤት ድርጅቱ በሀገሪቱ ድጋፍ ለሚያስፈልጋቸው ዜጎች የነፍስ አድን ስራ እየሰራ እንደሚገኝ ባወጣው መግላጫ አስታውቋል፡፡

በሰሜን ናይጀሪያ ቦርኖ ግዛት በተለይም ህፃናት እና እናቶች ላይ ትኩረቱን በማድረግ የሰብዓዊ ድጋፍ እያደረገ እንደሚገኝም ድርጅቱ አስታውቋል።

የአሁኑ የጦሩ እርምጃም በአካባቢው እርዳታ የሚያስፈልጋቸውን ዜጎች ጉዳይ አደጋ ላይ የጣለ ነው ብሏል።

ተቀማጭነቱን ፓሪስ ያደረገው ድርጅቱ ባሳለፍነው ሃምሌ ወር ናይጀሪያ ውስጥ ስድስት የረድኤት ሰራተኞቹ በሽብር ቡድኑ ተጠልፈው መወሰዳቸውን አስታውሷል፡፡

ቦኮ ሃራም ለ10 ዓመታት በናይጀሪያ በፈጸመው ጥቃት 30 ሺህ ያህል ዜጎች ህይወት ሲያልፍ፥ 2 ሚሊየን ዜጎች ደግሞ ከመኖሪያ ቀያቸው መፈናቀላቸው ይነገራል፡፡

ምንጭ፡- ቢ ቢ ሲ

You might also like
Comments
Loading...