Fana: At a Speed of Life!

የብሔራዊ የፀጥታና ፍትህ ግብረ ኃይል የእንኳን አደረሳችሁ መልዕክት አስተላለፈ

አዲስ አበባ ፣ ጳጉሜን 6 ፣ 2011 (ኤፍ ቢ ሲ) የብሔራዊ የፀጥታና ፍትህ ግብረ ኃይል አዲሱን አመት በማስመልከት የእንኳን አደረሳችሁ መልዕክት አስተላለፈ።

ግብረ ሃይሉ አዲሱ ዓመት አዲስ ተስፋ የሚሰነቅበት የሰላም፣ የጤናና የፍቅር መልካም ምኞት መግለጫዎች የሚቀርቡበት እና የሃገሪቱ ሰላምና ደህንነት በፅኑ መሰረት ላይ እንዲገኝ በጋራ የሚሰራበት ዘመን እንደሚሆን እምነቱን ገልጿል።

የዘንድሮው የዘመን መለወጫ በዓል ኢትዮጵያ በተስፋ ሰጭ የለውጥ ሂደት ላይ ሆና መከበሩ ልዩ ያደርገዋልም ብሏል።

ከሀገራዊ ለውጡ ጋር ተያይዞ ተከስቶ ከነበረው አለመረጋጋትና ከተለያዩ የፀጥታ ችግሮች ለመውጣት መንግስት በሃገሪቱ የህግ የበላይነት እንዲረጋገጥ ለማድረግ ከመቼውም ጊዜ በላይ እየሠራ በመሆኑ የፀጥታና ደህንነት ሁኔታው እየተሻሻለ መምጣቱን አንስቷል።

መንግስት የህግ የበላይነትን ለማረጋገጥ በጀመረው ጥረት ህብረተሰቡ ከፀጥታና ከፍትህ ግብረ ኃይል ጋር በመሆን  በቅንጀትና በትብብር እያደረገ ባለው እንቅስቃሴ በአሁኑ ወቅት አስተማማኝ ሰላምና መረጋጋት ማረጋገጥ መቻሉ እንደ ትልቅ ስኬት ይወሰዳልም ብሏል።

እየተሻሻለ የመጣውን ሰላም ወደ ላቀ ደረጃ ለማሸጋገር ግብረ ኃይሉ ሰላማዊ የመማር ማስተማር ሂደት እንዲኖር፣ የብሄር፣ ብሄረሰቦችና ህዝቦች የአብሮነት እሴት እንዲጠናከር የማድረግ፥ እንዲሁም ሀይማኖታዊና ባህላዊ ክብረ በዓላት ያለ ምንም የፀጥታ ችግር እንዲካሄዱ የማድረግ ስራዎችን ትኩረት ሰጥቶ እንዲሚሰራም ገልጿል።

በሀገሪቱና በህዝቦቿ ላይ ሊቃጡ የሚችሉ የሽብር ጥቃቶችን አስቀድሞ በመከላከል ይህን እኩይ ተግባር ሊፈፅሙ በሚችሉ የሽብር ቡድኖች ላይ ህጋዊ እርምጃ የመውሰድና የህብረተሰቡ እንቅስቃሴ እንዳይስተጓጎል የማድረግ ስራዎች በግብረ ኃይሉ ትኩረት እንደተሰጣቸውም አስታውቋል።

ግብረ ኃይሉ ማንኛውንም የሃገርንና የህዝብን ህልውና ስጋት ላይ የሚጥሉ አደጋዎችን ለመቆጣጣር ከመቼውም ጊዜ በላይ ትክክለኛ ቁመና ላይ መሆኑንም አረጋግጧል።

የህዝብን ሰላምና ደህንነት ለመጠበቅ ከህብረተሰቡ ጋር የሚከናወኑ ሥራዎች ተጠናክረው እንደሚቀጥሉ ጠቅሶ፥ ህብረተሰቡ ሊኖር የሚችልን የፀጥታ ስጋት በመጠቆም እንደተለመደው ከግብረ ኃይሉ ጎን እንዲቆም ጥሪውን አቅርቧል።

አዲሱ አመት ለመላው የኢትዮጵያ ህዝብ የሰላም፣ የብልጽግና እና የአንድነት እንዲሆንም መልካም ምኞቱን አስተላልፏል።

 

 

You might also like
Comments
Loading...