Fana: At a Speed of Life!

የመንግስት የከፍተኛ ትምህርት ተቋማት የቅበላ መርሓ ግብር ይፋ ሆነ

አዲስ አበባ፣ መስከረም 9፣ 2012 (ኤፍ.ቢ.ሲ) የመንግስት የከፍተኛ ትምህርት ተቋማት የቅበላ መርሓ ግብር ዛሬ ይፋ ሆነ፡፡
በዚህ መሰረት ነባር ተማሪዎች እስከ መስከረም 25 ቀን ድረስ የሚገቡ ሲሆን፥ አዳዲስ ተማሪዎች ደግሞ ከመስከረም 25 እስከ መስከረም 29 ድረስ ምዝገባ ያከናውናሉ ተብሏል፡፡
 
ሁሉም የመንግስት ከፍተኛ ትምህርት ተቋማት ጥቅምት 3 ቀን 2012 ዓ.ም መደበኛ ትምህርት ይጀምራሉ፡፡
 
እንዲሁም በዘንድሮው ዓመት ወደ ከፍተኛ የትምህርት ተቋማት የሚገቡ ተማሪዎች ምደባ ቀን እስከ መስከረም 19 ድረስ እንደሚጠናቀቅ የሳይንስና ቴክኖሎጂ ከፍተኛ ትምህርት ሚኒስትሯ ፕሮፌሰር ሂሩት ወልደማርያም አስታውቀዋል፡፡
 
በ2012 ትምህርት ዘመን በፍኖተ ካርታው ጥናት ምክረ ሐሳብ መሠረት የነባሩን ሥርዓተ ትምህርት ጉድለቶች የሚሞሉ የጋራ ኮርሶች ተለይተው ለተማሪዎች እንዲሰጡ ዝግጅት ተደርጓልም ነው የተባለው፡፡
 
በዚህም የመጀመሪያ ዲግሪ ትምህርት ዝቅተኛ ቆይታ ጊዜ አራት ዓመት መደረጉን የጠቀሱት ሚኒስትሯ፥ ለእነዚህ ኮርሶች የሚያስፈልጉ መምህራን ቅጥር በዩኒቨርሲቲዎች በኩል ተካሂዷል ብለዋል።
 
በተከለሰው ሥርዓተ ትምህርት መሠረት የመጀመሪያ ዓመት ተማሪዎች የመጀመሪያ ሴሚስተር ቅበላ በአራት አይነት የትምህርት ዘርፎች ይሆናል ተብሏል፡፡
 
እነዚህም የተፈጥሮ ሳይንስ፣ በተፈጥሮ ሳይንስ በመምህርነት እና በማህበራዊ ሳይንስ በመምህርነት መሆናቸው ተጠቁሟል፡፡
 
በሁለተኛው ሴሚስተር ደግሞ የተማሪዎችን የመጀመሪያ ሴሚስተር ውጤት መሠረት በማድረግ በአምስት የሙያ መስኮች ምደባ እንደሚደረግ ተጠቁሟል፡፡
 
በዚህም ህግ፣ ህክምና፣ የእንስሳት ህክምና፣ ፋርማሲ እና ኢንጂነሪንግ ናቸው፡፡
 
የሌሎቹ የሙያ መስኮች ምደባ የሚደረገው ከአንድ ዓመት የትምህርት ቆይታ በኋላ የተማሪዎችን ዓመታዊ ውጤት መሠረት በማድረግ መሆኑም ተጠቅሷል።
 
ሚኒስትሯ ፕሮፌሰር ሂሩት ወልደማርያም በአሁኑ ወቅት ዩኒቨርሲቲዎችን በተልዕኮና በልህቀት የመለየቱ ሥራ መጠናቀቁን እና ከዘንድሮው አመት ጀምሮ በሂደት የሚተገበር እንደሚሆን አስተረድተዋል።
 
ሠላማዊ የመማር ማስተማር ሂደትን የማረጋገጥና የማስቀጠል ሥራን በተመለከተም ዩኒቨርሲቲዎች በመተሳሰብ፣ በመተባበርና በፍቅር ከሌሎች ጋር አብሮ የመኖር ጥበብ ማሠልጠኛ መድረክ መሆናቸውን ሚኒስትሯ ገልፀዋል፡፡
 
በተጨማሪም ራስን ለማሻሻል፣ ቤተሰብን ለማገዝ እና የጋራ ሀገርን ለመገንባትም በርካታ ዕድል የሚሸመትበት ሰፊ ገበያ መሆኑን የገለፁት ሚኒስትሯ፥ በተቃራኒው አልባሌ አመለካከቶችና ተግባራት ላይ ለመውደቅም አጋጣሚ የሚፈጠርበት ስፍራ መሆኑን ጠቅሰዋል።
 
በመሆኑም ባለፉት ዓመታት በዩኒቨርሲቲዎች ውስጥ የተከሰቱ ችግሮችን በዝርዝር በመለየት ለሁሉም አካላት ኃላፊነት እና ተጠያቂነት የሚያሰፍን አሰራር እንዲተገበር ስምምነት ላይ መደረሱን መግለፃቸውንከሳይንስና ከፍተኛ ትምህርት ሚኒስቴር ያገኘነው ተጨማሪ መረጃ ያመለክታል፡፡
 
 
በምስክር ስናፍቅ እና ሙሀመድ አሊ
You might also like
Comments
Loading...