Fana: At a Speed of Life!

ውጭ ጉዳይ ሚኒስትር አቶ ገዱ አንዳርጋቸው ከሩሲያው አቻቸው ሰርጌ ላቭሮቭ ጋር ተወያዩ

አዲስ አበባ፣ ጳጉሜን 5፣ 2011 (ኤፍ.ቢ.ሲ) የኢፌዲሪ ውጭ ጉዳይ ሚኒስትር አቶ ገዱ አንዳርጋቸው ከሩሲያው የውጭ ጉዳይ ሚኒስትር ሰርገይ ላቭሮቭ ጋር ሞስኮ ተወያዩ።

በሩሲያ ፌደሬሽን የውጭ ጉዳይ ሚኒስቴር ጽህፈት ቤት የተደረገው ውይይት በሁለቱ ሃገራት ሁለትዮሽ ግነንኙነት ዙሪያ ትኩረቱን ያደረገ መሆኑን የውጭ ጉዳይ ሚኒስቴር ቃል አቀባይ ጽህፈት ቤት አስታውቋል።

በውይይቱም የውጭ ጉዳት ሚኒስትር አቶ ገዱ አንዳርጋቸው፥ ኢትዮጵያ እና ሩሲያ 121 ዓመታት ያስቆጠረ እና ከአድዋ ድል ማግስት በተጀመረ ዲፕሎማሲያዊ ግንኙነት መሠረቱ የተጣለ ጠንካራ ግንኙነት ያላቸው ሃገራት መሆናቸውን ገልፀዋል።

ሩሲያ በጠላት ወረራ ጊዜ ከኢትዮጵያ ጎን ከተሠለፉ ወዳጆች አንዷ መሆኗንም አስታውቀዋል።

በሕዝብ ለሕዝብ ግንኙነት መስክም ታዋቂው ባለቅኔ አሌክሳንደር ፑሽኪን ትውልደ ኢትዮጵያዊ እና ሩሲያዊ መሆኑ እንዲሁም በሺዎች የሚቆጠሩ ኢትጵያውያን በሩሲያ ነጻ የከፍተኛ ትምህርት ዕድል ተጠቃሚዎች እንዲሆኑ መደረጉ ሌላው የግንኙነቱ ጠንካራነት መገለጫዎች መሆናቸውን ገልጸዋል።

ይህንን በጠንካራ መሠረት ላይ የተገነባ ወዳጅነት በቴክኖሎጂ፣ በአቪየሽን ኢንዱስትሪ እና በባህል መስኮች ትብብር ወደ ላቀ ደረጃ ለማሸጋገር ሁለቱ አገሮች በመጪው ጥቅምት ወር በሚያካሄዱት የጋራ ኮሚሽን ስብሰባ በትኩረት እንደሚሰራ ክቡር አቶ ገዱ ገልጸዋል።

አቶ ገዱ አክለውም፥ የሩሲያ ኩባንያዎች በኢትዮጵያ በተፈጠረው ምቹ ንግድና ኢንቨስትመንት ሁኔታ እንዲሳተፉም ጥሪያቸውን አቅርበዋል።

ሩሲያ በኢትዮጵያ የምታደርገው እንቅስቃሴ ወደ አፍሪካ ገበያ ለመግባት መንደርደሪያና ኢትዮጵያም የአፍሪካ ደጃፍ መሆኗን በመጥቀስ፤ ሩሲያ በዕድሉ ልትጠቀም እንደሚገባ አቶ ገዱ አመላክተዋል።

የሩሲያ የውጭ ጉዳይ ሚኒስትር ሰርጌ ላቭሮቭ በበኩላቸው፥ የኢትዮጵያ እና ሩሲያ ታሪካዊ ግንኙነት እንደሚያደንቁ ገልጸዋል።

ኢትዮጵያ በአፍሪካ የሩሲያ ቁልፍ አጋር ሃገር እንደሆነች በመግለጽ፤ በሁለቱ ሃገሮች መካከል በየጊዜው የሚደረጉ የሁለትዮሽ ውይይቶች ትብብሩን ወደ ላቀ ከፍታ እንደሚወስደው ያላቸውን እምነት ገልጸዋል።

በባለ ብዙ ወገን ግንኙነት መስክ ኢትዮጵያ በተባበሩት መንግስታት ድርጅት የምታራምደው ኃላፊነት የተሞላው የውጭ ግንኙነት ፖሊሲ እንደሚያደንቁና ከሩሲያ ጋርም በተለያዩ አጀንዳዎች ዙሪያ በጋራ የሚያደርጉት እንቅስቃሴ የሚበረታታ መሆኑን ሰርጌ ላቭሮቭ ገልጸዋል።

የሩሲያ ኩባንያዎች በኢትዮጵያ በሽያጭ መስክ ብቻ ሳይሆን በተሽከርካሪ መገጣጠሚያ መስክ ያላቸውን ሠፊ ልምድ ይዘው መግባት እንደሚፈልጉ ገልጸዋል።

የሩሲያ ሳይንስ አካዳሚ ከኢትዮጵያ ጋር በባዮሎጂ መስክ የሚያደርጉትን ትብብር ለማጠናከር ያላቸውን ፍላጎት አስታውቀዋል።

ከውጭ ጉዳይ ሚኒስቴር አኳያም በሩሲያ የዲፕሎማቲክ አካዳሚ የኢትዮጵያ ዲፕሎማቶች የሚሠለጥኑበትን ሆኔታ እንደሚያመቻቹ አስታውቀዋል።

በውይይቱ የመከላከያ ሚኒስትር አቶ ለማ መገርሣ በቀጣይ በሁለቱ ሃገራት መካከል በመከላከያ መስክ ትብብሮች ለማድረግ መልካም አጋጣሚ መሆኑን ጠቁመዋል።

በውይይቱ የሩሲያ ኩባንያዎች በኢትዮጵያ በተለይ በማዕድን ፍለጋና ልማት ኩባንያዎቹ ለሁለቱም ሃገራት የጋራ ጥቅም መሥራት እንደሚችሉ ገልጸዋል።

የውጭ ጉዳይ ሚኒስትር አቶ ገዱ አንዳርጋቸው ከሩሲያ የውጭ ጉዳይ ሚኒስቴር ትኩረት እንዲሠጥባቸው ለቀረቡት የትብብር መስኮች የቅርብ ክትትል በማድረግ ለውጤታማ ትብብር እንደሚሠራ አረጋግጠዋል።

ሁለቱ የውጭ ጉዳይ ሚኒስትሮች ውይይታቸው ካጠናቀቁ በኃላ የፕሬስ መግለጫ የሰጡ ሲሆን የሩሲያ የውጭ ጉዳይ ሚኒስትር ሰርጌ ላቭሮቭ የሁለቱን ሃገራት ግንኙነት በሚያጠናክሩ ርዕሰ-ጉዳዮች ዙሪያ መግባባት የተሞላበት የሃሳብ ልውውጥ መደረጉን ገልጸዋል።

የውጭ ጉዳይ ሚኒስትር ክቡር አቶ ገዱ አንዳርጋቸው በበኩላቸው ይህን መሰል ውይይት መደረጉ ለግንኙነቱ መጠናከር እጅግ አስፈላጊ መሆኑን ጠቅሰው በቅርቡም የጋራ ኮሚሽን ስብሰባ እንደሚደረግ አስታውቀዋል።

You might also like
Comments
Loading...