Fana: At a Speed of Life!

ወ/ሮ ሂሩት የተመድ ዋና ጸሀፊ፣ የሶማሊያ ልዩ ተወካይና የተመድ የሶማሊያ ተልዕኮ ድጋፍ ሰጪ ሃላፊ ጋር ተወያዩ

አዲስ አበባ፣ ጳጉሜን 5 ፣2011 (ኤፍ ቢ ሲ) የውጭ ጉዳይ ሚኒስትር ዴኤታ ወይዘሮ ሂሩት ዘመነ የተመድ ዋና ጸሀፊ፣ የሶማሊያ ልዩ ተወካይና የተመድ የሶማሊያ ተልዕኮ ድጋፍ ሰጪ (ዩኒሶም) ሃላፊ ጀምስ ስዋንን በዛሬው ዕለት በጽህፈት ቤታቸው ተቀብለው አነጋግረዋል።

በዚህ ወቅትም ኢትዮጵያ እና ሶማሊያ ረጅም ዘመናትን ያስቆጠረና በመርህ ላይ የተመሰረተ ጠንካራ ግንኙነት ያላቸው መሆኑን ወይዘሮ ሂሩት ተናግረዋል።

ኢትዮጵያ በሶማሊያ ዘላቂ ሰላምና መረጋጋት እንዲሰፍን የምታደርገውን ድጋፍ አጠናክራ እንደምትቀጥልም ገልጸዋል።

አሚሶም ከሶማሊያ የፀጥታ ሃይሎች ጋር በመቀናጀት በሶማሊያ የሽግግር መንግስት እቅድ መሰረት በሀገሪቱ ሰላምና መረጋጋት እንዲሰፍን ወሳኝ ሚና እየተጫወተ መሆኑንም አንስተዋል።

ወይዘሮ ሂሩት አክለውም ሶማሊያዊያን የራሳቸውን ጉዳይ በራሳቸው እንዲወስኑ ኢትዮጵያ በአሚሶም ጥላ ስር ድጋፏን አጠናክራ ትቀጥላልች ነው ያሉት።

ጀምስ ስዋን በበኩላቸው ኢትዮጵያ በአፍካ ቀንድ ሰላም እንዲሰፍን እያደረገች ያለውን እንቅስቃሴ ማድነቃቸውን ከውጭ ጉዳይ ሚኒስቴር ያገኘነው መረጃ ያመላክታል።

ኢትዮጵያ በቀጠናው በተለይም በሶማሊያ ሰላምና መረጋጋት እንዲሰፍን ቁልፍ ሚና አላት ያሉት ጀምስ፥ የሶማሊያን ሰላም አስተማማኝ ደረጃ ላይ ለማድረስ የቀጠናው ሀገራት ተመሳሳይ ድምፅና አቋም መኖር ጠቃሚ መሆኑን ጠቁመዋል።

በሶማሊያ የፌደራል መንግስቱና በክልላዊ መንግስታት መካከል ያለውን ግንኙነትና ትብብር ይበልጥ ተጠናክሮ በሚቀጥልበት ሁኔታም ድጋፍ ማድረግ እንደሚያስፈልግም ጀምስ ስዋን ገልፀዋል።

You might also like
Comments
Loading...