Fana: At a Speed of Life!

ኮሚሽኑ የዘመን መለወጫ በዓል በሰላም እንዲከበር ዝግጅት ማድረጉን አስታወቀ

አዲስ አበባ ፣ ጳጉሜን 6 ፣ 2011 (ኤፍ ቢ ሲ) የዘመን መለወጫ በዓል በሰላም እንዲከበር አስፈላጊውን ቅድመ ዝግጅት ማድረጉን የአዲስ አበባ ፖሊስ ኮሚሽን አስታወቀ።

ኮሚሽኑ ለወንጀልና ትራፊክ አደጋ መከላከል ተግባሩ ልዩ ትኩረት በመስጠትና ሙሉ የሰው ሃይሉን በማሰማራት ከሌሎች የፀጥታ አካላት ጋር ተቀናጅቶ ወደ ተግባር መግባቱን አስታውቋል።

የአዲስ አበባ ፖሊስ ኮሚሽን ኮሚሽነር ጌቱ አርጋው እንዳሉት፥ በበዓላት ወቅት የሰው እና የተሽከርካሪ እንቅስቃሴ ስለሚጨምር ይህንን ታሳቢ በማድረግ በገበያና በመዝናኛ ስፍራዎች እንዲሁም በተለያዩ አካባቢዎች የትራፊክ አደጋ እንዳይከሰትና ወንጀል እንዳይፈፀም ኮሚሽኑ በትኩረት ይሰራል።

ህብረተሰቡም የፀጥታ ጉዳይ የጋራ ጉዳይ መሆኑን ተገንዝቦ ራሱን ከወንጀል እና ከትራፊክ አደጋ በመጠበቅ ለፀጥታ ሃይሉ የሚያደርገውን ትብብርና የሚሰጠውን ጥቆማ አጠናክሮ እንዲቀጥልም ጥሪ አቅርበዋል።

የአዲስ አበባ ፖሊስ ኮሚሽን ለሚያከናውናቸው ተግባራት ስኬታማነትም ህብረተሰቡ እያደረገ ላለው ቀና ትብብር ምስጋና በማቅረብ በዓሉ የሰላም፣ የደስታና የስኬት እንዲሆን መልካም ምኞታቸውን ገልፀዋል።

ህብረተሰቡ የፖሊስን አገልግሎት ለማግኘትም ሆነ አጠራጣሪ ነገሮች ሲያጋጥሙትና መረጃ ለመስጠት፥ በነፃ የስልክ መስመር 991 እና 816 ወይም በ 011- 111- 01 -11 መጠቀም እንደሚችልም ኮሚሽኑ ገልጿል።

 

You might also like
Comments
Loading...