Fana: At a Speed of Life!

ከ7 ሚሊየን በላይ የኢትዮጵያ ብር እና 53 ሺህ የአሜሪካ ዶላር ተያዘ

አዲስ አበባ ፣ ጳጉሜን 4 ፣ 2011 (ኤፍ ቢ ሲ) የአዲስ አበባ ፖሊስ ኮሚሽን ከ7 ነጥብ 6 ሚሊየን በላይ የኢትዮጵያ ብር እና 53 ሺህ የአሜሪካ ዶላር መያዙን አስታወቀ፡፡

ኮሚሽኑ ገንዘቡን የውጭ ሃገራት ገንዘቦችን በህገ ወጥ መንገድ ሲመነዝሩ ከነበሩ ግለሰቦች ላይ መያዙንም አስታውቋል።

በኮሚሽኑ የንፋስ ስልክ ላፍቶ ክፍለ ከተማ ፖሊስ መምሪያ የወንጀልና ትራፊክ አደጋ ምርመራ ዲቪዚዮን ከህዝብ በደረሰው ጥቆማ ትናንት በተጠርጣሪዎቹ መኖሪያ ቤት ባደረገው ድንገተኛ ፍተሻ ገንዘቡን መያዝ ችሏል።

በዚህም 7 ሚሊየን 608 ሺህ የኢትዮጵያ ብር እና 53 ሺህ የአሜሪካ ዶላር እንዲሁም የተለያዩ ሃገራት ገንዘቦችን ከገንዘብ መቁጠሪያ ማሽን ጋር መያዙን የክፍለ ከተማው ፖሊስ መምሪያ የወንጀልና ትራፊክ አደጋ ምርመራ ዲቪዚዮን ሃላፊ ኮማንደር አወል አህመድ ተናግረዋል።

ተጠርጣሪዎቹ የውጭ ሃገራት ዜጎች የሚበዙባቸውን አካባቢዎች በጥናት በመለየትና ቪላ ቤቶችን በመከራየት በህገ ወጥ መንገድ የውጭ ሃገራት ገንዘቦችን ይመነዝሩ ነበር ተብሏል።

ከጉዳዩ ጋር በተያያዘ ደላሎችን ጨምሮ 10 ግለሰቦች በቁጥጥር ስር ውለው ምርመራ እየተደረገባቸው መሆኑንም ኮማንደር አወል መናገራቸውን ከአዲስ አበባ ፖሊስ ኮሚሽን ያገኘነው መረጃ ያመላክታል።

በድብቅ የሚከናወኑ መሰል ህገ ወጥ ተግባራት የሃገርን ኢኮኖሚ የሚያዳክሙ እና ጤናማ የገበያ ስርዓትን የሚጎዱ በመሆናቸው ህብረተሰቡ የሚያደርገውን ጥቆማ አጠናክሮ እንዲቀጥልም ጥሪ አቅርበዋል።

 

 

You might also like
Comments
Loading...