Fana: At a Speed of Life!

ከ34 ነጥብ 2 ሚሊየን ብር በላይ ግምት ያላቸው አልባሳትና የትምህርት መርጃ መሳሪያዎች ድጋፍ ርክክብ ተደረገ

አዲስ አበባ ፣ መስከረም 6 ፣ 2012 (ኤፍ ቢ ሲ) በእኛ ለእኛ የኢትዮጵውያን ወጣት በጎ ፈቃደኞች መርሃ-ግብር የተሰበሰበ ከ34 ነጥብ 2 ሚሊየን ብር በላይ ግምት ያላቸው አልባሳትና የትምህርት መርጃ መሳሪያዎች ድጋፍ ርክክብ ተደረገ።

በተጠናቀቀው የትምህርት ዘመን ከመኖሪያ እና ከትምህርት ገበታቸው ተፈናቅለው ለነበሩ ተማሪዎች ከ300 በላይ በሚሆኑ “በእኛ ለእኛ የኢትዮጵውያን ወጣት በጎ ፈቃደኞች” የአልባሳትና የትምህርት መርጃ ቁሳቁሶችን የማሰባሰብና የበጎ ሥራ አገልግሎት ተግባር ሲከናወን መቆየቱ ይታወሳል።

ባለፉት ሁለት ወራትም 34 ሚሊየን 240 ሺህ 773 ብር ግምት ያላቸው አልባሳትና የትምህርት መርጃ ቁሳቁሶች ማሰባሰብ መቻሉን ከትምህርት ሚኒስቴር ያገኘነው መረጃ ያመላክታል።

በዚህም 4 ሚሊየን 368 ሺህ 760 ልዩ ልዩ የትምህርት ቁሳቁሶች፣ 102 ሺህ 690 አልባሳት፣ 1 ሺህ 152 አነስተኛ ፔርሙሶች፣ 248 ኳሶች፣ 121 የሴቶች ንጽህና መጠበቂያና ሌሎች ቁሳቁሶችም ድጋፍ ተደርጓል።

በመርሃ-ግብሩ የትምህርት መሳሪያዎች ማምረቻ ድርጅት 113 ሺህ ብር የሚገመት ደብተር፣ የ180 ሺህ የደብተር ሽፋንና የማሳተም ሥራ በማከናወን፣ ለበጎ ፈቃደኞች ቢሮ በመስጠት እና የቁሳቁስ ማስቀመጫ መጋዘን በመፍቀድ ድጋፍ ማድረጉ ተገልጿል።

በበጎ ፈቃደኞቹ አማካኝነት የተሰባሰቡት የትምህርት መርጃ ቁሳቁሶችና አልባሳት የኢትዮጵያ አብራሪዎች ማህበር የትራንስፖርት አገልግሎት በመስጠት ድጋፍ ለማድረግ ዝግጁ መሆኑን ገልጿል።

ሃገር አቀፍ የወላጆች ማህበር በበኩሉ በየአካባቢው ካሉ በጎ ፈቃደኞች ጋር በመተባበር የትምህርት መርጃ ቁሳቁሶችንና አልባሳቱን ለተማሪዎች በቀጥታ እንዲደርስ በማድረግ የበኩሉን እገዛ አደርጋለሁ ብሏል።

 

You might also like
Comments
Loading...