Fana: At a Speed of Life!

ኦዳ የተቀናጀ የትራንስፖርት አገልግሎት 50 አውቶብሶችንና 2 የነዳጅ ማደያዎችን አገልግሎት አስጀመረ

አዲስ አበባ፣ መስከረም 12፣ 2012 (ኤፍ.ቢ.ሲ) ኦዳ የተቀናጀ የትራንስፖርት አገልግሎት 50 አውቶብሶችን እና ሁለት የነዳጅ ማደያዎችን በትናንትናው እለት በይፋ ስራ አስጀመረ።

ኦዳ የተቀናጀ የትራንስፖርት አገልግሎት በ400 ሚሊየን ብር በመግዛት ከውጭ ሀገር ያስገባቸውን 50 አውቶብሶች በትናንትናው እለት ነው በይፋ አስመርቆ ስራ ያስጀመረው።

በምረቃ ስነ ስርዓቱ ላይም የኦሮሚያ ክልል ምክትል ርእሰ መስተዳድር አቶ ሽመልስ አብዲሳ፣ የኦዲፒ ማእከላዊ ጽህፈት ቤት ኃላፊ አቶ አዲሱ አረጋ እና የአዲስ አበባ ምክትል ከንቲባ ኢንጂነር ታከለ ኡማን ጨምሮ ሌሎች የመንግስት የስራ ሀላፊዎች ተገኝተዋል።

በአውቶብሶቹ ምረቃ ላይ የተገኙት የመንግስት የስራ ሀላፊዎቹም የእንኳን ደስ አላችሁ መልእክት አስተላልፈዋል።

በተያያዘ የኦዳ የተቀናጀ የትራንስፖርት አገልግሎት አካል የሆኑ በገላን ከተማ በ42 ሚሊየን ብር የተገነቡ ሁለት የነዳጅ ማደያዎችም በትናንትናው እለት በይፋ ተመርቀው ስራ ጀምረዋል።

ኩባንያው እያስገነባቸው ካሉ 10 የነዳጅ ማደያዎች ውስጥ ነው ሁለቱ በትናነትናው እለት በይፋ ተመርቀው አገልግሎት መስጠት የጀመሩት።

የኦዳ የተቀናጀ የትራንስፖርት አገልግሎት አክሲዮን ማህበር ስራ አስኪያጅ አቶ እሸቱ ዘለቀ እንዳስታወቁት በትናንትናው እለት በይፋ የተመረቁት ሁለት የነዳጅ ማደያዎች ለ24 ሰዓታት አገልግሎት የሚሰጡ ሲሆን፥ ለ100 ሰዎች የስራ እድል ፈጥረዋል።

የነዳጅ ማደያዎቹ ከተሽከርካሪዎች በተጨማሪ ለትልልቅ ፋብሪካዎች፣ ለግንባታ ስራዎች እንዲሁም ለግብርና እና ለአግሮ ፕሮሰሲንግ ፕሮጀክቶች ነዳጅ እንደሚያቀርቡም አስታውቀዋል።

የኦዳ የተቀናጀ የትራንስፖርት አገልግሎት በቀጣይ 3 ዓመታት ውስጥ 100 የነዳጅ ማደያዎችን ለመገንባት አቅዶ እየሰራ መሆኑም ተገልጿል።

You might also like
Comments
Loading...