Fana: At a Speed of Life!

ኢጋድ የደቡብ ሱዳን ተቀናቃኝ ሃይሎች የደረሱትን ስምምነት አወደሰ

አዲስ አበባ ፣ መስከረም 2 ፣ 2012 (ኤፍ ቢ ሲ) የምስራቅ አፍሪካ የልማት በይነ መንግስታት (ኢጋድ) የደቡብ ሱዳን ተቀናቃኝ ሃይሎች የደረሱትን ስምምነት አወደሰ።

ፕሬዚዳንት ሳልቫ ኪር እና የቀድሞው ተቀዳሚ ምክትል ፕሬዚዳንት ሪክ ማቻር በጁባ የፊት ለፊት ውይይት ካደረጉ በኋላ በመጭው ህዳር ወር በሃገሪቱ ጊዜያዊ የሽግግር መንግስት ለመመስረት በመርህ ደረጃ መስማማታቸው ይታወሳል።

ከዚህ ባለፈም በህገ መንግስት ማሻሻያ፣ በፀጥታና ደህንነት እንዲሁም በደቡብ ሱዳን ሊኖር ስለሚገባው ክልላዊ አስተዳደር ዙሪያ ከትናንት በስቲያ በስፋት መወያየታቸውም የሚታወስ ነው።

አሁን የተደረሰው ስምምነት አበረታችና የሚደነቅ መሆኑን በደቡብ ሱዳን የኢጋድ ልዩ መልዕክተኛ ኢስማኤል ዋይስ ተናግረዋል።

ባለው አሁናዊ ሁኔታም በሃገሪቱ ጥምር መንግስት መመስረት እንደሚቻል ጠቅሰው፥ በሃገሪቱ የሚገኙ ሌሎች ተቀናቃኝ ሃይሎችም በሃገሪቱ የመፍትሄ አካል እንዲሆኑ ጥሪያቸውን አቅርበዋል።

ቀሪ ጉዳዮችም በአንድነት በትብብር ተግባራዊ እንደሚደረጉም ገልጸዋል።

በሁለቱ ተቀናቃኝ ሃይሎች ውይይት ወቅት ሃገሪቱ ከሶስት አመታት የሽግግር ጊዜ በኋላም ምርጫ የማካሄድ እቅድ እንዳላትም ተገልጿል።

 

You might also like
Comments
Loading...