Fana: At a Speed of Life!

ኢትዮጵያ የኒውክሌር ቴክኖሎጂን ለመጠቀም የሚያስችላትን ተጨማሪ ፕሮቶኮል ፈረመች

አዲስ አበባ፣ መስከረም 9፣ 2012 (ኤፍ ቢ ሲ) ኢትዮጵያ የኒውክሌር ቴክኖሎጂን ለማንኛውም አይነት ሰላማዊ አገልግሎት መጠቀም የሚያስችላትን “የተጨማሪ ፕሮቶኮል” ስምምነት ተፈራርማለች፡፡

በኦስትሪያ ቪዬና እየታከሄደ ባለው 63ኛው የዓለም አቀፉ የአቶሚክ ኢነርጂ ኤጄንሲ ዓመታዊ ጉባኤ ላይ የተሳተፉት የኢኖቬሽንና ቴክኖሎጂ ሚኒስትር ዶክተር ኢንጂነር ጌታሁን መኩሪያ ከኤጄንሲው ተጠባባቂ ዋና ዳይሬክተር ኮርኔል ጋር ስምምነቱን ተፈራርመዋል።

ስምምነቱ ኢትዮጵያ ለዓለም አቀፉ ማህበረሰብ ፕሮግራሞቿን ሁሉ በግልጽ ለማከናወን ፈቃደኝነቷን ያረጋገጠችበት መሆኑም ነው የተገለፀው።

ይህ ፕሮቶኮል ሀገሪቱ ከዚህ በፊት የፈረመቻቸውን ሌሎች ስምምነቶች ለማጠናከር በኤጄንሲው የወጣ ተጨማሪ የግልፀኝነት ግዴታዎችን የሚያስቀምጥ ነውም ተብሏል።

ሚኒስትሩ ኢትዮጵያ ኒውክሌርን በተለይም ለጤና፣ ለግብርና፣ ለኢንዱስትሪ እና የኤሌክትሪክ ሀይልን ለማመንጨት ጭምር ለመጠቀም ዕቅድ እንዳላትና በዚህ ዘርፍ ኤጄንሲው ከሀገራቸው የሚጠብቀውን ግልፀኝነት ለማረጋገጥ እንዲቻል መንግስት የተጨማሪ ፕሮቶኮል ሰነዱ እንዲፈረም መወሰኑን አስታውቀዋል።

የዘላቂ ዕድገት ግቦችን ያለ ቴክኖሎጂ ተጠቃሚነት ማሳካት አይቻልም ያሉት ሚኒስትሩ፥ይህም የኒውክሌር ቴክኖሎጂንም ያካትታል ብለዋል።

በማናቸውም መንገድ ዓለማችንን ከኒውክሌር ስጋት ለማስወገድ ኤጄንሲው ለሚያወጣቸው ማናቸውም ፕሮቶኮሎች ኢትዮጵያ ጠንክራ እንደምትሰራ ማረጋገጣቸውን ከኢኖቬሽንና ቴክኖሎጂ ሚኒስቴር ያገኘነው መረጃ ያመላክታል።

You might also like
Comments
Loading...