Fana: At a Speed of Life!

ኢትዮጵያ ቡና ካሳዬ አራጌን በይፋ የክለቡ ዋና አሰልጣኝ አድርጎ ሾመ

አዲስ አበባ፣ ነሃሴ 30፣ 2011 (ኤፍ.ቢ.ሲ) የኢትዮጵያ ቡና እግር ኳስ ክለብ የቀድሞ የክለቡ ተጫዋች አሰልጣኝ ካሳዬ አራጌን የክለቡ ዋና አሰልጣኝ አድርጎ በዛሬው እለት በይፋ ሾሟል።
 
የኢትዮጵያ ቡና እግር ኳስ ክለብ እና አሰልጣኝ ካሳዬ አራጌ በዛሬው እለት በኢንተርኮንቲኔንታል ሆቴል በተካሄደ ዝግጅት በይፋ የፊርማ ስነ ስርዓት አካሂደዋል።
 
በፊርማ ስነ ስርዓቱ ላይም የኢትዮጵያ ቡና እግር ኳስ ክለብ ፕሬዚዳንት መቶ አቀላ ፈቃደ ማሞ፣ የክለቡ ስራ አስኪያጅ ስንታየሁ በቀለ እና የደጋፊ ማህበሩ ፕሬዚዳንት ክፍሌ አማረ ተገኝተዋል።
 
በስምምነቱ መሰረትም አሳልጣኝ ካሳዬ አራጌ ክለቡን ለ4 ዓመታት በአሰልጣኝነት የሚመራ ሲሆን፥ በውሉ መሰረት የመጀመሪያው ዓመት ያለ ቅድመ ሁኔታ እንደሚሰራ ተገልጿል።
 
በቀሪዎቹ 3 ዓመታት ግን ክለቡ በፕሪሚየር ሊጉ ከ1ኛ እስከ 3ኛ ደረጃን ይዞ መጨረስ እንዳለበት ውድመ ሁኔታ በውሉ ላይ ተቀምጧል።
 
በፊርማ ስነ ስርዓቱ ላይም የአሰልጣኝ ካሳዬ አራጌ ወደ ቡና መምጣት የቀድሞ የክለቡን አጨዋወት እንደሚመልስ ተስፋ እንደጣለ ተነግሯል።
 
አሰልጣኝ ካሳዬ አራጌ በኢትዮጵያ እግር ኳስ ክለብ ውስጥ ባሳለፈው የተጫዋችነት ጊዜ ይለብስ የነበረው 15 ቁጥር ማልያም በወቅቱ በነበረው መልክ ታትሞ ተበርክቶለታል።
 
የኢትዮጵያ ቡና እግር ኳስ ክለብ የስራ አመራር ቦርድ አዲስ የአሰልጣኝ ቅጥርን የሚያከናውን የእግር ኳስ ኦፕሬሽንና ቴክኒክ አስተዳደር ኮሚቴ አዋቅሮ ሲንቀሳቀስ መቆየቱ ይታወሳል።
 
የክለቡን የጨዋታ ዘይቤ ይረዳል በሚል የቀድሞውን የክለቡን ኮከብ ካሳዬ አራጌን በአሰልጣኝነት እንዲመረጥ በወሰነው መሰረትም ምርጫው ተካሂዷል።
 
ካሳዬ አራጌ በዛሬው እለትም በይፋ የኢትዮጵያ ቡና እግር ኳስ ክለብ አሰልጣኝ በመሆን የፈረመ ሲሆን፥ በቀጣይ የውድድር ዘመንም ክለቡን በዋና አሰልጣኝነት የሚመራ ይሆናል።
 
አሰልጣኝ ካሳዬ አራጌ ከ1979 እስከ 1994 ዓ.ም የኢትዮጵያ ቡናን በመሃል ሜዳ ተጫዋችነት ያገለገለ ሲሆን፥ ከተጫዋችነት ዘመኑ በኋላም ለ1 ዓመት ከ6 ወር ገደማ የኢትዮጵያ ቡና እግር ኳስ ክለብ ዋና አሰልጣኝነት መርቷል።
 
ከኢትዮጵያ ቡና እግር ኳስ ክለብ ጋር በነበረው የ1 ዓመት ከግማሽ ቆይታው የጥሎ ማለፍ ዋንጫን ከክለቡ ጋር ማንሳት እንደቻለ ይታወሳል።
You might also like
Comments
Loading...