Fana: At a Speed of Life!

ኢትዮጵያ መስማት በተሳናቸው የአፍሪካ አትሌቲክስ ሻምፒዮና 3ኛ ደረጃን ይዛ አጠናቀቀች

አዲስ አበባ፣ መስከረም 13፣ 2012 (ኤፍ.ቢ.ሲ) ኢትዮጵያ መስማት በተሳናቸው የመጀመሪያው የአፍሪካ አትሌቲክስ  ሻምፒዮና 3ኛ ደረጃን ይዛ አጠናቀቀች።

በኬንያ አስተናጋጅነት ከመስከረም 5 11 2012 ዓ.ም ሲካሄድ በቆየው የአፍሪካ መስማት የተሳናቸው አትሌቲክስ ሻምፒዮና ኢትዮጵያ  7 ሜዳሊያን በማስመዝገብ ከኬንያ እና ናይጀሪያ ቀጥላ 3ኛ ደረጃን ይዛ ማጠናቀቅ ቻለችው።

በአትሌቲክስ ሻምፒዮናው ኬንያ በ20 ወርቅ ፣ 16 ብር፣ 18 ነሀስ ፣ ናይጀሪያ በ2 ወርቅ ፣ 5 ብርና 1 ነሀስ ፣ ኢትዮጵያ በ2 ወርቅ፣ 3 ብር እና 2 ነሀስ በማስመዝገብ ከ1-3 ያለውን ደረጃ ይዘው ያጠናቀቁት።

12 ሀገራት የተሳተፉበት 1ኛው መስማት የተሳናቸው አትሌቲክስ ሻምፒዮና በወንዶች 5000 ሜትር የማነ ብርሃነ ወርቅ ሲያሸንፍ በ1500 ሜትር ነሀስ አስመዝግቧል ።

በሴቶች 1500 ሜትር አስናቁ እንዳለ የወርቅ ሜዳሊያ ተሸላሚ ስትሆን በ800 ሜትር አስናቁ እንዳለና አለም መዝገቡ የብርና ነሀስ ሜዳሌያ አሸናፊ ሆነዋል ፡፡

በወንዶች ከፍታ ዝላይ ሚሊዮን ደምሴ የብር ሜዳሊያ አሸናፊ ሲሆን በድብልቅ ዱላ ቅብብል አያንቱ ደሪባ ፣ እሸቴ ካሳ፣ አብርሃም ወንድሙ እና ሚሊዮን ደምሴ የብር ሜዳሊያ ማስመዝገብ ችለዋል።

በአፍሪካ ለመጀመሪያ ጊዜ በተካሄደው ሻምፒዮና ኢትዮጵያ 4 ወንድ እና 4 ሴት አትሌቶችን በማሳተፍ 7 ሜዳሊያን በማግኘት ሌሎች አገሮች ካሳተፏቸው አትሌቶች አንፃር ሲታይ የተሻለ እንደሆነ መገለጹን ከኢትዮጵያ ስፖርት ፌዴሬሽን የተገኘ መረጃ ያመለክታል።

You might also like
Comments
Loading...